प्यूठानको गौमुखी गाउँपालिका वडा नं. १ अर्खाको लामिडाँडा र वडा नंं.३ रजवाराको देउराली जोड्ने पुलको उद्घाटन गरिएको छ । सङ्घीय सरकारमार्फत २ करोड ७२ लाख ७४ हजार लागतमा बनेको झोलुङ्गे पुलको बिहीबार प्रतिनिधि सभा सदस्य सूर्य बहादुर थापा क्षेत्रीले उद्घाटन गरेका हुन ।

१ सय ७० मिटर उचाइ र ३७३.८ मिटर लम्बाइ रहेको पुलको उद्घाटन कार्यक्रममा सांसद थापाले  विकासमा सबैको ऐक्यबद्धता आवश्यक रहेको बताए । लुम्बिनी प्रदेशकै अग्लो र लामो भएकाले लामिडाँडा–देउराली जोड्ने पुल पर्यटनका हिसाबले पनि महत्त्वपूर्ण गन्तव्य बन्न सक्ने थापाले बताए ।

अर्खाकी स्थानीय यमुना पुनले खोला, जङ्गली जनावर, पहिरो आदिको डर त्रासमा आउजाउ गर्न बाध्य अर्खा र रजवाराका स्थानीयलाई पुल निर्माणपछि यात्रा गर्न सहज हुने बताइन । त्यस्तै  रजवाराका स्थानीय गोवर्धन थापाले वारपार गर्दा डेढ घण्टा हिँड्नुपर्ने बाध्यताको अन्त्य भएको र पुलले यहाँको  शिक्षा , स्वास्थ्य र दैनिकीलाई सहज बनाएको बताए ।

गौमुखी गाउँपालिका वडा नं. ३  का वडा अध्यक्ष जग बहादुर पुनको अध्यक्षतामा भएको कार्यक्रमको सञ्चालन गौमुखी गाउँपालिकाका प्रमुख प्रशासकीय अधिकृत तुल्सीराम पौडेलले गरेका थिए । उद्घाटन कार्यक्रममा उपस्थित अतिथिलाई वडा नं. १ का वडाध्यक्ष दिल बहादुर थापाले स्वागत गरेका थिए भने स्थानीयले पञ्चेबाजा सहित नाचगान गरेका थिए ।

अधिकारी अपर तामाकोसी जे.भि.बानेश्वरले निर्माण सम्पन्न गरेको लुम्बिनी प्रदेशकै सबैभन्दा लामो उक्त पुल सामुद्रिक सतह देखी १ हजार ५ सय ६२ मिटरको उचाइमा रहेको छ । पुलमा एक पटकमा ८ सय ७ जनासम्म यात्रा गर्न सक्ने सस्पेन्सन पुल डिभिजन कार्यालय ललितपुर पुल्चोकका इन्जिनियर गोपाल थापाले बताए ।