प्रेस चौतारी नेपाल जिल्ला शाखा प्यूठान ले २६ औं स्थापना दिवस विभिन्न कार्यक्रम गरी मनाएको छ । स्थापना दिवसको अवसरमा चौतारीले प्यूठान अस्पताल बिजुवारमा रहेका बिरामीहरुलाई फलफूल वितरण गरेको छ भने रक्तदान कार्यक्रम पनि गरिएको प्रेस चौतारी नेपाल जिल्ला शाखा प्यूठानका अध्यक्ष बासुदेव गिरीले जानकारी दिए ।

सोमबार विहान जिल्ला अस्पताल बिजुवारमा उपचाररत ४१ जना बिरामीलाई फलफूल वितरण गरिएको हो । त्यस्तै स्थापना दिवसको अवसरमा आयोजित रक्तदान कार्यक्रममा प्रेस चौतारी नेपाल लुम्बिनी प्रदेशका कोषाध्यक्ष एलबी थापा, सदस्य कमल बि.क, प्रेस चौतारी नेपाल जिल्ला शाखा प्यूठानका निवर्तमान अध्यक्ष बिजयसिंह भारती र स्वंयमसेवक रक्तदाता समाजका केन्द्रीय सदस्य मनु लामा गरी ४ जनाले रक्तदान गरेका थिए ।

कार्यक्रमको प्रमुख अतिथि लुम्बिनी प्रदेश सभा सदस्य तुल्सीराम शर्माले स्थापना दिवसको अवसरमा बिरामीसँग सम्बन्धित रहेर स्थापना दिवस मनाउनु राम्रो कार्य भएको बताए । फलफूल वितरण गर्दै शर्माले बिरामीहरुको स्वास्थ्य लाभको कामना समेत गरेका छन् ।

प्रेस चौतारी नेपाल जिल्ला शाखा प्यूठानका अध्यक्ष बासुदेव गिरीको अध्यक्षतामा भएको कार्यक्रममा प्रेस चोतारी नेपालका केन्द्रीय सदस्य गिरुप्रसाद भण्डारी, नेपाल पत्रकार महासंघका केन्द्रीय सदस्य सुशिल पोख्रेल, प्रगतिशिल पत्रकार संघका केन्द्रीय कोषाध्यक्ष प्रज्वल पहाडी, लगायतको सहभागिता रहेको थियो । कार्यक्रमको सञ्चालन सचिव राम बहादुर विश्वकर्माले गरेका थिए ।