प्यूठानका उद्यमीहरूले खाद्य तथा गुण नियन्त्रण कार्यालयबाट पाइने अनुज्ञा पत्र पाउन, पाएपछि नवीकरण गर्न सकस भएको गुनासो गरेका छन् । घरेलु तथा साना उद्योग विकास कार्यालय प्यूठानको आयोजनामा शुक्रवार खलङ्गामा भएको उत्पादन वस्तुको गुणस्तर र लेवलिङ्ग सम्बन्धी अभिमुखीकरण कार्यक्रममा साना उद्योगीहरूले व्यावसायिक समस्याहरू राखेका हुन् । जिल्लामा अनुज्ञा पत्र ल्याउनु पर्ने व्यवसायीहरूले नेपालगन्ज पुग्ने र त्यहाँको कार्यालयले गर्ने ढिलासुस्तीले हैरानी भोग्नु परेको उद्यमी वसन्त शर्माले बताए । ‘यति टाढाबाट पुग्दा पनि काम नगरिदिने, पटक पटक बोलाउँदै दुःख दिने मात्रै भयो’ शर्माले भने,‘ मूल्य अभिवृद्धि कर, विद्युत्, लेभलिङ, अनुज्ञा पत्रमा थुप्रै झन्झट हुने गरेका छन् ।’

कार्यक्रममा खाद्य, प्रविधि तथा गुण नियन्त्रण डिभिजन कार्यालय तुलसीपुरका खाद्य निरीक्षक अधिकारी सुदर्शन गोसाईंले खाद्यको गुणस्तरीयता र लेभलिङका विषयमा सहजीकरण गरेका थिए । उनले मापदण्ड अनुसार गुणस्तर कायम गरी खाद्य पदार्थ विक्री गरे दीर्घकालीन रूपमा राम्रो हुने बताए । गोसाईंले उत्पादनको नाम, उत्पादक÷वितरकका नाम÷पुरा ठेगाना, सम्मिश्रण, ब्याच नम्बर, उत्पादित मिति, उपभोग मिति, कुल तौल÷आयतन, खुद तौल÷आयतन, खाद्य गुणस्तरको अनुज्ञा पत्र नम्बर, उद्योग दर्ता नम्बर अनिवार्य राख्नु पर्ने बताए ।

कार्यक्रममा प्रमुख अतिथि समेत रहेकी लुम्बिनी प्रदेश सभा सदस्य धनलक्ष्मी श्रेष्ठले संविधानले नै खाद्य सम्बन्धी हक, उपभोक्ताको हक जस्ता अधिकारीलाई मौलिक हकको रूपमा राखेको बताइन् । उनले गुणस्तरीय बस्तु उत्पादन र लेवलिङ ध्यान दिन आग्रह गरिन् ।

जिल्लामा उत्पादन भएका वस्तुहरूको गुणस्तर कायममा पुनः तार्जकीका लागि अभिमुखीकरण कार्यक्रम गरिएको घरेलु तथा साना उद्योग विकास कार्यालयका निमित्त प्रमुख मनि बहादुर गुरुङले जानकारी दिए ।