प्यूठान नगरपालिका–५ काफलबुटा स्थित शिद्धभूमी प्राथमिक विद्यालयमा न्यानो कपडा र शैक्षिक सामग्री वितरण गरिएको छ । नेपाल स्वयंसेवी रक्तदाता समाज प्यूठानले बुधवार ५३ जना विद्यार्थीलाई सामग्री हस्तान्तरण गरिएको जनाएको छ ।

नेपाल स्वयंसेवी रक्तदाता समाजका केन्द्रीय सदस्य मनु लामाले न्यानो माया अभियान चलाइ ६६ हजार सात सय ५२ रुपैयाँ बराबरको सामाग्री वितरण गरिएको जानकारी दिए । उनले ग्रामीण क्षेत्रका विद्यालयमा आउने बालबालिका लाई न्यानो होस भन्दै अभियान चलाई  एक एक सेट न्यानो ट्र्याक, न्यानो टोपी , टिसर्ट , कपि, सीसाकलम , लगायतका सामाग्री वितरण गरेको बताए ।

सोही विद्यालयमा अध्ययन गरेका आकाश भण्डारीले न्यानो कपडाका अभियन्ताहरूलाई धन्यवाद दिए । अभियानमा आफू समेत सहभागी भएकोले विद्यालयको शैक्षिक गुणस्तरका लागि सबै क्षेत्रबाट सहयोग गर्ने बताए ।

विद्यालयका प्रधानाध्यापक बाला खड्काले विद्यालयका बालबालिकाहरूको  अवस्था दयनीय देखेपछि न्यानो कपडा दिने सोच बनाएको र आज सबैलाई न्यानो कपडा बाँड्न पाउँदा गर्व महसुस भएको बताए । विद्यालयमै पुगेर गरेको सहयोगले विद्यालयको शैक्षिक सुधारमा महत्त्वपूर्ण भूमिका खेल्ने विश्वास व्यक्त गरे ।

त्यस्तै कार्यक्रमका विशेष अतिथि सुमन सुवेदीले बिरामी बचाउने र रगत उपलब्ध गराउने क्षेत्रमा काम गर्दै आएको रक्तदाता समाज प्यूठानले विद्यार्थी, बालबालिका र शैक्षिक सुधारमा महत्त्वपूर्ण काम गरेको बताए ।

नेपाल स्वयंसेवी रक्तदाता समाजका युवाहरू मनु लामा , आकाश भण्डारी , जीवन खनाल , गोकुल शाह , हरि बस्नेत , रुद्र पोख्रेल , सुमन सुबेदी , रोशन केसी लगायतले सहयोग अभियान चलाएका थिए । अभियानमा विभिन्न सहयोगी दाताहरूले सहयोग गरेका थिए । आगामी दिनमा पनि जिल्लाका ग्रामीण भेगमा पर्ने विद्यालयहरूमा थप सहयोग गर्ने रक्तदाता समाज प्यूठानले जनाएको छ ।

२०१५ सालमा स्थापना भएको विद्यालयमा प्यूठान नगरपालिका ५ र ६ का बालबालिकाले अध्ययन गर्दै आएका छन् । आफ्ना बालबालिकाले न्यानो कपडा पाएपछि अभिभावक समेत खुसी भएको प्रतिक्रिया दिएका छन् ।