झिमरुक गाउँपालिका अध्यक्ष पित बहादुर महतरा क्षेत्रीले साढे २१ करोड भन्दा बढि शिक्षा क्षेत्रमा खर्च भएको बताएका छन् । शुक्रबार झिमरुक गाउँपालिका ८ स्थित जनता माध्यमिक विद्यालय टिमुरचौरको ६५ औं बार्षिक उत्सव तथा ३२ औं अभिभावक दिवस कार्यक्रममा बोल्दै अध्यक्ष क्षेत्रीले यस्तो बताएका हुन् ।

गाउँपालिकाबाट ४ करोड २८ लाख ९० हजार र प्रदेश तथा केन्द्रबाट १७ करोड ३७ लाख १४ हजार ८ सय गरि २१ करोड ६६ लाख ४ हजार ८ सय शिक्षा क्षेत्रमा खर्च भईरहेको जानकारी गराएका हुन् । साथै बाहिरी रुपमा पालिकामा बजेट धेरै नै हुन्छ भन्ने गरे पनि बास्तवमा त्यो नभएको अध्यक्ष क्षेत्रीको भनाई छ ।

झिमरुक गाउँपालिका ८ स्थित जनता माध्यमिक विद्यालय टिमुरचौरले ६५ औं बार्षिक उत्सव तथा ३२ औं अभिभावक दिवस मनाएको छ । कार्यक्रममा शिक्षिका सरस्वता भट्टराईले स्वागत मन्तव्य राखेका थिए भने विद्यालयका प्रधानाध्यापक बिजय सागर गिरीले विद्यालयको शैक्षिक, आर्थिक, भौतिक तथा व्यवस्थापकीय क्षेत्रको प्रतिवेदन प्रस्तुत गरेका हुन् ।