२०८० फागुन १९प्युठान नगरपालिका ४ ढाँडखोलाकी शारदा सापकोटाले कृषि खेती गर्न थालेको करिब ३ बर्ष भयो । शारदाले व्यावसायिक रूपमा तरकारीले खेती र धान, गहुँ, मकै खेती पनि गर्दै आएकी छिन् ।
अरु भन्दा तरकारी खेतीबाट मनग्य आम्दानी हुने भएपछि तरकारी खेती गर्न थालेको शारदा बताउँछिन् । श्रीमानले ३ बर्ष अघि देखि सुरु गरेको तरकारी खेतीलाई आफुले अहिले निरन्तरता दिएको उनको भनाई छ । तरकारी खेतीका लागि उनको बारीमा ६ वटा टनेलहरु रहेका छन् । ४ रोपनी जग्गामा शारदाले टमाटर, फुलगोपी, बन्दागोपी, काक्रा खेती गर्दै आएको सुनाउँछिन् । तरकारी बेचेर बर्षमा उनले ३ देखि ४ लाख रुपैयाँसम्म आम्दानी गरेको सापकोटाले बताईन् ।
जिल्लामा तरकारी खेतीसंगै काक्रा खेती उनको लागि नयाँ अभ्यास भएको छ । १ रोपनी जाग्गाबाट सुरु गरेको तरकारी खेती आम्दानी बढ्दै गएपछि अहिले ४ रोपनी क्षेत्रफलामा खेती गर्दै आएको सापकोटाको भनाई छ । यहि व्यवसायबाट शारदाको ७ जनाको परिवार पालिएका छन् ।
प्रधानमन्त्री कृषि आधुनिकिकरण परियोजना कार्यान्वयन इकाई प्यूठानको सहयोगमा व्यवसायिक रूपमा शारदाले तरकारी खेती सुरु गरेकी हुन् । मेहनत गर्न सके आफ्नै गाउँमा पनि सुन फलाउन सकिन्छ भन्ने उनी एउटा गतिलो उदाहरण बन्न सफल भएकी छिन् ।
