लुम्बिनी प्रदेशको मुख्यमन्त्रीमा नेकपा (माओवादी केन्द्र) का जोखबहादुर महरा नियुक्त भएका छन् । शुक्रबार लुम्बिनी प्रदेश प्रमुख अमिक शेरचनले नेपालको संविधानको धारा १६८ को उपधारा २ बमोजिम महरालाई मुख्यमन्त्री नियुक्त गरेका हुन् । नेता महराले बिहीबार प्रदेशमा सहभागी भएका दलहरूसँग सरकार निर्माण देखि सञ्चालन सम्मको सहमति पछि हस्ताक्षर सँगै नयाँ नेतृत्व चयन हुने पक्का भएको थियो ।

शुक्रबार ४८ जना प्रदेशसभा सदस्यहरूको हस्ताक्षरसहित मुख्यमन्त्रीका लागि प्रदेश प्रमुख समक्ष दाबी पेस गरेकाले उनलाई प्रदेश प्रमुख शेरचनले मुख्यमन्त्रीमा नियुक्त गरेका हुन् । गठबन्धन दलका नेताहरू नेकपा एमालेका संसदीय दलका नेता लिला गिरी, एमाले प्रमुख सचेतक तुल्सी चौधरी, एकीकृत समाजवादीकी एक मात्र सांसद भगवती घिमिरे, नागरिक उन्मुक्तिका धर्म बहादुर चौधरी, राजकुमार चौधरी, निर्मला देवी चौधरी र नरमाया ढकालसहित ४ जनाले सामूहिक हस्ताक्षर गरी समर्थन जनाएपछि महरालाई ४८ जनाको समर्थन जुटेको छ ।

लुम्बिनी प्रदेश सभामा ८७ सदस्य छन् । बिहीबार नेपाली कांग्रेसका डिल्लीबहादुर चौधरीले मुख्यमन्त्रीबाट राजीनामा दिएपछि संविधानको धारा १६८ को उपधारा २ बमोजिम प्रदेश मन्त्रिपरिषद् गठन प्रक्रिया सुरू भएको हो ।