न्यायिक समिति जिल्ला समन्वय समिति प्यूठानको दोस्रो सम्मेलन झिमरुक गाउँपालिका मच्छिमा सञ्चालन भएको छ । सम्मेलनको मंगलबार प्यूठानका प्रतिनिधि सभा सदस्या सूर्य थापाले उद्घाटन गरेका हुन् ।

उद्घाटन कार्यक्रममा बोल्दै प्रमुख अतिथि समेत रहेका सांसद थापाले प्यूठानी जनताका सपना पूरा गर्नको लागि अघि सरेको बताए । कुनै पनि एउटा निश्चित ठाउँ र व्यक्तिको लागि नभई सिंगो जिल्लाका लागि हित हुनेगरी आफुहरु लागि परेको बताए । जस्तो सुकै काम अगाडी बढाउन र समस्याको समस्या समाधान गर्न जति अप्ठ्यारो अरु केही नभएको सांसद थापाको भनाई छ । साथै सरकारले जिम्मेवारीपूर्वक काम नगरेको समेत उनले आरोप लगाएका छन् । कहाँ र कुन ठाउँमा के आवश्यकता छ भनी नबुझी नजानी हचुवाको भरमा बजेट विनियोजन गर्दा निश्चित समस्या भएका ठाउँमा बजेट पर्न नसकेको बताए ।

न्यायिक समितिमा भएका अप्ठ्यारा विषयहरु र न्यायलाई प्रभावकारी बनाउनको लागि सम्मेलनको आयोजना गरिएको झिमरुक गाउँपालिकाका उपाध्यक्ष प्रमोद पोख्रेलले बताए ।

सम्मेलनमा प्यूठान जिल्लाका ९ वटै स्थानीय तहका न्यायिक समिति सदस्यहरुको सहभागिता रहेको छ । प्यूठान क्षेत्र १ का लुम्बिनी प्रदेशका माननीय पूर्व मन्त्री तुल्सीराम शर्मा, लुम्बिनी प्रदेश सभा सदस्य निमा गरी, धनालक्ष्मी श्रेष्ठ, मल्लरानी गाउँपालिका अध्यक्ष कृष्ण बहादुर खड्का, माण्डवी गाउँपालिकाका अध्यक्ष नमराज अधिकारी, बिष्णु कुमार गिरी, जिल्लाका ९ वटै स्थानीय तहका उपप्रमुखहरु लगायतको सहभागिता रहेको छ ।