२०८१ जेष्ठ २६प्यूठान नगरपालिकाले अपाङ्गता भएका महिलाहरुका लागि निःशुल्क बाख्रा वितरण गरेको छ । महिला अपाङ्गताहरुलाई बाख्रा पालन सम्बन्धि सीप विकास तालिम सहित बाख्रा हस्तान्तरण गरेको हो । नगरपालिका भित्र रहेका १० वटै वडाका १/१ जना अपाङ्गता भएका महिलाहरुका लागि २/२ वटा बाख्रा वितरण गरेको छ ।
बाख्रा हस्तान्तरण कार्यक्रममा बोल्दै प्यूठान नगरपालिकाका उपमेयर देबेन्द्र बर्माले जन्मिदै विभिन्न प्रकारले समस्यामा रहेर पीडा भोगिरहेका व्यक्तिहरुका लागि पेवाको रुपमा बाख्रा वितरण गरिएको बताए । आगामी दिनमा पनि यस्ता कार्यक्रमलाई थप प्रभावकारी बनाउन पशुसेवा शाखा र आर्थिक विकास समितिले यथार्थ समस्यामा रहेका वर्गहरुलाई छुट्याई बजेट विनियोजनको समयमा प्रस्ताव पेश गर्न आग्रह गरेका छन् ।
त्यस्तै नगरप्रवक्ता तथा ३ नं वडाध्यक्ष सुमनराज श्रेष्ठले प्रकृतिले जन्मिदै ठगेका व्यक्तिहरुको जीवनलाई सहि ढंगले जीवनयापन गर्नमा सहयोग पुग्ने उद्देश्यसहित बाख्रा वितरण गरिएको बताए । शारीरिक रुपमा अपाङ्गता भएका व्यक्ति, बर्गीय पक्ष, लक्षित बर्ग तथा गरिबीका रेखामुनी रहेकाहरुका लागि यो कार्यक्रम महत्वपूर्ण भएकाले आफुले लिएका बाख्रा सहि तरिकाले पालन गरी आर्थिक उर्पाजनमा बृद्धि गर्न पनि सुझाव दिए ।
साथै तालिममा सहभागिहरुलाई बाख्रा कसरी पाल्ने, कस्तो बाख्रा पाल्ने, यसको उपचार, यसको लागि खानपानमा ध्यान दिनुपर्ने कुरा लगायतका बारेमा प्यूठान नगरपालिकाका पशु सेवा शाखा प्रमुख गिरीराज पौडेलले जानकारी दिएका छन् ।
