नेपाल आदिवासी जनजाति पत्रकार महासंघ (फोनिज) को २५औं स्थापना दिवसको अवसरमा रक्तदान कार्यक्रम गरिएको छ । आईतबार नेपाल आदिवासी जनजाति पत्रकार महासंघ (फोनिज) जिल्ला शाखा प्यूठानले दिवसको अवसरमा रक्तसञ्चार केन्द्र बिजुवारमा रक्तदान गरेर मनाएको हो ।

कार्यक्रममा तीन जना संचारकर्मीले रक्तदान गरेका छन् । रक्तदान गर्नेमा दलित पत्रकार महासंघ प्यूठान शाखाका अध्यक्ष कमल वि.क, स्पेश फोर्के टेलिभिजनका प्यूठान संवाददाता मधुसुदन पोख्रेल र रेडियो झुलेनीका विवश जि.एम रहेका छन् ।

रक्तदान नै जीवन दान रहेकाले प्यूठान जिल्ला अस्पतालमा रगतको अभाव हुन नदिनको लागि रक्तदान गरिएको नेपाल आदिवासी जनजाति पत्रकार महासंघ –फोनिज प्यूठानका अध्यक्ष सुजल श्रेष्ठले बताए । सबैलाई रक्तदान गर्नमा उत्प्रेरणा दिनुका साथै जिल्ला अस्पतालमा रगतको अभावले कसैले मृत्युवरण गर्न नपरोस भन्ने उद्देश्यका साथ पनि रक्तदान कार्यक्रमलाई प्राथमिकतामा राखिएको अध्यक्ष श्रेष्ठको भनाई छ ।

नेपाल स्वयंसेवी रक्त दाता समाजका केन्द्रिय सदस्य मनु लामाले पछिल्लो समय रक्तदान गर्नेको संख्या बढेपछि रगत पनि बढेको बताए ।

रगत लिन चाहाने हरुले एक पोका दिएर लिनुपर्ने रक्त दाता सञ्चार विजुवारमा कार्यरत अर्जुन थापाले जानकारी दिए ।उनका अनुसार २ सय पिन जति रक्तसञ्चारमा स्टोर हुन सक्ने क्षमता रहेको छ । साथै रक्तसञ्चारबाट रगतहरु प्राय जिल्ला अस्पतालमा नै प्रयोग भईरहेको उनले बताए ।