प्यूठानको नौबहिनी गाउँपालिका ६ लुङ स्थित बहाने बजारमा तीजको रौनक बढेको छ । गाउँपालिकाले तीज गीत प्रतियोगिताको आयोजना गरेपछि शनिबार बहाने बजारमा भिडभाड बढेको हो ।

त्यहाँको भिडभाड अनुसार झन्डै एक हजार जति कार्यक्रममा सहभागि भएका छन् । हरितालिका तीज नजिकिदैं गर्दा गाउँपालिकाले महिला दिदीबहिनीहरुको प्रतिभालाई सम्मान सहित मौलिक कला संस्कृतिलाई जगेर्ना गर्नको लागि कार्यक्रमको आयोजना गरिएको गाउँपालिकाले जनाएको छ । नौबहिनी सहित जिल्लाका विभिन्न ठाउँमा दर खाने देखि तीज विशेष कार्यक्रमहरु भईरहेका छन् ।

गाउँपालिका अध्यक्ष दिल बहादुर थापाले कार्यक्रमको उद्घाटन गरेका हुन् । प्रतियोगितामा भाग लिनका लागि पालिका भित्रका ४५ महिला आमा समूहले दर्ता गराइसकेका छन् ।

प्रथम, द्वितीय र तृतीय हुने समुहले क्रमशः २०, १५ र १० हजारका दरले पुरस्कार प्राप्त गर्ने गाउँपालिका अध्यक्ष दिल बहादुर थापाको भनाई छ । त्यस्तै सहभागी भए वापत प्रत्येक आमा समूहलाई नगद रु. पाँच हजार रुपैयाँको व्यवस्था गरिएको पालिका अध्यक्ष थापाले बताए ।

गीतमा मौलिक लोक संस्कृती झल्किने विषयमा गीत गाउनुपर्ने जनाइएको छ ।