भिंग्री स्वर्गद्वारी सडकमा तीन वर्षमा ३३ दुर्घटना भएका छन् । प्रहरीका अनुसार यी दुर्घटनामा परेर २५ जनाको ज्यान गएको छ । सडक जोडिएको १७ वर्ष पुरा हुन थालेको छ । २०६४ सालमा सुरुवात गरिएको सडक फराकिलो नहुँदा पटक पटक सवारी दुर्घटना हुने गरेको छ । भिंग्री देखि १४ किलोमिटर दुरीको यो सडकमा आर्थिक वर्ष २०७८/०७९ देखि २०८०/०८१ सम्म ३ वर्षको अवधिमा मात्रै २५ जनाको दुर्घटनामा परेर ज्यान गएको ट्राफिक कार्यालय प्युठानले जनाएको छ । त्यस बिचमा ३३ सवारी साधन दुर्घटना हुँदा ४७ जना घाइते भएको प्रहरीको तथ्याङ्क छ ।

दुर्घटना हुनुको मुख्य कारण साँघुरो सडक, खराब मौसम र चालकको लापरबाही रहेको ट्राफिक कार्यालय प्युठानका प्रमुख शरद के.सी ले बताए । “साना गाडी स्वर्गद्वारी पुगे पनि ठुला गाडीको लागि मुस्किल छ” उनले भने– “बाटो साँघुरो भएकै कारण साना गाडिलाई सहज भएपनि ठुला गाडीलाई अप्ठ्यारो छ ।”

गत वर्ष जेठ २९ गते यही सडकमा स्वर्गद्वारी दर्शन गरेर फर्किने क्रममा कार दुर्घटना हुँदा ८ जनाको ज्यान गयो । त्यसपछि यो सडक सुधारको विषयमा सम्बन्धित सरोकारवाला पक्षहरूको चासो बढेको छ । गत वर्ष मात्रै सडक डिभिजन कार्यालय प्युठानको पहलमा सडक बोर्ड मार्फत ११ करोड बजेटको व्यवस्था गरेर सडक सुरक्षाको लागि खर्च गरिएको सडक डिभिजन कार्यालय प्युठानका सूचना अधिकारी राजेन्द्र कार्की जानकारीले दिए । टेन्डरमार्फत गरिएको उक्त बजेटबाट सडक सुरक्षाका लागि सडक मर्मत, ट्राफिक सेप्टी, खाल्डाखुल्डी पुर्ने लगायतका कार्य भएको सूचना अधिकारी कार्कीको बताए ।

यही सडकमा सडक पूर्वाधार विकास कार्यालय मार्फत  गत वर्ष ३ करोड ५४ लाख खर्च भएको छ । उक्त रकमबाट यो सडक क्षेत्र अन्तरगत घडेरी र रुमालेमा पहिरो नियन्त्रण,४ सय मिटर सडक सुरक्षा ब्यारियर निर्माण र सडक मर्मतको काम भएको कार्यालय प्रमुख चन्द्र शाहले बताए । विभिन्न निकायबाट करोडौँ रकम खर्च भए पनि कम बजेट र दिगो योजनाको अभावमा यो सडकको समस्या दिगो रूपमा समाधान हुन  अझै सकेको छैन