नागबेली बहुउद्देश्यीय कृषि सहकारी संस्थाले कृषकलाई ५० प्रतिशत अनुदानमा उन्नत मुर्रा क्रस भैँसी वितरण गर्न लागेको छ ।

ग्रामीण उद्यम तथा आर्थिक विकास आयोजना बुटवलको आर्थिक सहयोगमा कृषकको ५० प्रतिशत लागत सहभागिता हुने गरी उन्नत जातका ४२ मुर्रा क्रस भैँसी र बिउका लागि एउटा राँगो वितरण गर्न थालिएको सहकारीका अध्यक्ष विष्णु पाण्डेले बताए ।

कृषि तथा पशुपन्छी विकास मन्त्रालय, ग्रामीण उद्यम तथा आर्थिक विकास आयोजना, भैँसी पालन दूध उत्पादन तथा बजारीकरण उप–आयोजनाको ६८ लाख र लाभग्राही कृषकको ६८ लाख गरी १ करोड ३६ लाखको परियोजना १ वर्षसम्म सञ्चालन हुने पाण्डेले बताए । उक्त परियोजनाका लागि सहकारीमा आबद्ध २५ जना महिला र ९ जना पुरुष लाभग्राही छनोट भइसकेको सहकारीले जनाएको छ ।

उक्त लागतमा भैँसी तथा राँगा वितरण सँगसँगै पूर्वाधार(गोठ) निर्माण, उन्नत भैँसी खरिद, मोटर सहित च्याँपाकटर खरिद, दाना मिल, मिल्क चिलिंगभ्याट, पावरटिलर खरिद, मिल्क एनालाईजर, औषधी खरिद, दाना खरिद, सिप तथा क्षमता विकास लगायतका कार्यक्रम सञ्चालन हुनेछन् ।

प्यूठान नगरपालिका ३ बिजयनगरमा रहेको नागबेली बहुउद्देश्यीय कृषि सहकारी संस्थाले जुम्रीमा आफ्नै कृषि बजार समेत स्थापना गरेको छ । गतवर्षदेखी संस्थाले मासुजन्य उत्पादन, तरकारी तथा फलफूलजन्य उत्पादन, कृषि उत्पादन, रासायनिक मल, हलेदो, अदुवा, कागती लगायत सामाग्री सङ्कलन तथा बिक्री गर्दै आएको छ ।

३४ वटा सटर रहेको कृषि बजारमा विभिन्न कृषिजन्य उत्पादनको सङ्कलन तथा बिक्री हुने गर्दछ । झन्डै ८ सय सदस्य रहेको सहकारीमा कृषकको उत्पादन वृद्धिका लागि मल तथा बिउ बिक्री  वितरण,कृषकको उत्पादित बस्तु सङ्कलन तथा बिक्री र कृषकको बचत सङ्कलन गर्ने अध्यक्ष पाण्डेले बताए । उनका अनुसार सहकारीले स्थानीय तह र विभिन्न निकायको सहकार्यमा उत्पादित दूधमा अनुदान, पशु बिमा लगायतका कार्यक्रम समेत सञ्चालन गरेको छ ।