चालु आर्थिक वर्षको २ महिनामा प्युठानको स्वर्गद्वारीमा ६२ हजार बढी पर्यटक भित्रिएका छन् । साउन र भदौ महिनामा मात्रै ६२ हजार २ सय ४४ जना पर्यटकले दर्शन गरेको  स्वर्गद्वारी आश्रमका कोठारी तामु प्रसाद न्यौपानेले बताए ।

न्यौपानेका अनुसार साउन महिनामा भारतीय ३८ हजार १ सय १३ र नेपाली पाँच हजार छ सय ७२ गरी ४३ हजार सात सय ८५ ले दर्शन गरेका छन् ।  भदौमा १२ हजार ७९ भारतीय र ६ हजार तीन सय ८० नेपाली गरी १८ हजार चार ५९ पर्यटक स्वर्गद्वारी आएका हुन् ।

स्वर्गद्वारीमा वैशाखे पूर्णिमा र कार्तिकको पूर्णिमामा विशेष मेला लाग्ने गर्दछ । हिन्दु धर्मालम्बीले साउनको महिनालाई पूजाआजा तथा मन्दिर दर्शनको महिनाका रूपमा  लिने गर्दछन् । त्यसैले यो महिनामा अत्यधिक दर्शनार्थीले स्वर्गद्वारी मन्दिर दर्शन गर्ने गरेको आश्रमले जनाएको छ । अविरल वर्षाका कारण भालुवाङ्ग–प्यूठान सडक खण्ड पटक–पटक अवरुद्ध हुँदा गत वर्षभन्दा यो वर्ष केही कम पर्यटक भित्रिएको कोठरी प्रमुख न्यौपानेले बताए । त्यस्तै अघिल्लो वर्ष श्रावणमा ५ वटा सोमवार परेकाले यस वर्ष भन्दा बढी पर्यटक आएको आश्रमको भनाइ छ ।