धादिङको झ्याप्लेखोलामा झरेको पहिरोमा पुरिएका ३ वटा गाडीबाट ३० जनाको शव निकालिएको छ । उक्त पहिरोमा एउटा बस र दुइटा माइक्रोबस पुरिएको अवस्थामा भेटिएका हुन् ।

चितवनबाट काठमाडौंका लागि छुटेको ३ ज १३४५ नम्बरको माइक्रोबस बाट १३ जनाको शव निकालिएको छ ।

सशस्त्र प्रहरी बल, नेपालका सह-प्रवक्ता डीएसपी शैलेन्द्र थापाका अनुसार त्यही पहिरोमा गोरखाबाट काठमाडौं जादै गरेको ना ४ ख २२७० नम्बरको यात्रुवाहक बस पनि पहिरोमा पुरिएको अवस्थामा फेला परेको छ । उक्त बसबाट ३ जना पुरुषको शव निकालिएको छ ।

त्यसैगरी बुटवलबाट काठमाडौं जादै गरेको लु १ ज ४५७८ नम्बरको माइक्रोबस पुरिँदा १४ जनाको शव निकालिएको प्रहरीले जनाएको छ ।

पहिरोमा अन्य गाडीहरू पनि पुरिएको आशंकामा खोजी कार्य जारी रहेको प्रहरीले जनाएको छ।