स्थानीय तहले प्लास्टिकका पुल र मालाहरूमा रोक लगाएपछि स्थानीय पुष्प व्यवसायी खुसी भएका छन् । जिल्लाका तीन स्थानीय तहमा प्लास्टिकका फूल र माला विक्रीमा रोक लगाइएको छ ।

माण्डवी गाउँपालिका, स्वर्गद्वारी नगरपालिका र प्यूठान नगरपालिकाले प्लास्टिकका फुल र माला प्रयोग तथा बेचबिखन नगर्न सूचना जारी गरेका छन् । चाडपर्वमा प्लास्टिकका माला प्रयोगले पर्वको गरिमा र मानव स्वास्थ्यलाई राम्रो नगर्नुका साथै स्थानीय पुष्प व्यवसायीलाई पनि मार पर्ने हुनाले प्लास्टिकका फूल र माला विक्रीमा रोक लगाइएको माण्डवी गाउँपालिकाका अध्यक्ष नमराज अधिकारीले बताए । रोक लगाउनुका साथै माण्डवी गाउँपालिकाले फुल खेती गर्नका लागि कृषकलाई आर्थिक तथा प्राविधिक सहयोग गरेको बताए ।

माण्डवी गाउँपालिका–३ लामाचौरमा फुल खेती गर्दै आएकी  चेतकला के.सी.ले पालिकाले  प्लास्टिकका फूल माला प्रयोगमा रोक लगाएपछि आफूहरूलाई राहत भएको बताइन् ।

९ स्थानीय तह रहेको प्यूठानमा तीन स्थानीय तहले प्लास्टिकजन्य फूल मालाको बिक्री वितरणमा  रोक लगाएको सूचना प्रकाशन गरेका छन् । स्वर्गद्वारी नगरपालिकाले  नगर क्षेत्रभित्र फूल खेती गरेका किसानको नाम, ठेगाना र सम्पर्क फोन नम्बर पनि सार्वजनिक गरेको छ ।