अरिङ्गालले लखेट्दा लडेर खुट्टा भाँचिएकी ऐरावतकी गाउँपालिका ३ अर्जामकी १३ वर्षीय बालिका पवित्रा परियारको उपचार खर्च जुटाउन कठिनाइ भएको छ ।

कार्तिक ८ गते साँझ पवित्रा गाउँमै क्रिकेट खेल हेर्न गएकी थिइन । सोही क्रममा अरिङ्गालले लखेट्दा भाग्ने क्रममा लडेर उनको दायाँ खुट्टा भाँचिएको थियो । आर्थिक अभावका कारण उनको उपचार खर्च तिर्न कठिनाइ भएको उनका आफन्त प्रमेस परियारले बताए ।

बालिकाको दायाँ खुट्टाको गोलिगाँठो भन्दा माथिको भागमा २ ठाउँबाट भाँचिएको उपचारमा संलग्न हाड जोर्नी तथा नसा रोग विशेषज्ञ चिकित्सक मदन ज्ञवालीले बताए । हाल बालिकालाई बुटवलको चौराहा अस्पतालमा राखिएको छ । बुवा गुमाएकी पवित्राको आइतबार खुट्टाको अपरेसन गरी रड राखिएको हो ।

उनको उपचार खर्च १ लाख भन्दा बढी आएको अस्पताल श्रोतले जनाएको छ । उक्त रकम नभएपछि परिवारले सहयोगको याचना गरेका छन् । पैसा नहुँदा अस्पतालसँग उधारो राखेर उपचार गरिएको परिवारले जनाएको छ । आर्थिक अवस्था कमजोर रहेकी पवित्राको घरमा एक्ली आमा छिन । उनका एउटा दाइ बुवाको मृत्यु भएपछि लागेको ऋण तिर्न भारतमा काम गर्न गएको परिवारले जनाएको छ ।