प्यूठानमा यातायात व्यवसायीको प्रतिस्पर्धाले दर्जन नयाँ एसी बसहरू थपिएका छन् । यसले गर्दा सेवाग्राहीलाई यात्रा गर्न  सहज भएको छ । पछिल्लो सात महिनाको अवधिमा प्यूठानमा एक दर्जन बढी स्तरीय बस भित्रिएका छन् । दुई यातायात व्यवसायी कम्पनीबिचको प्रतिस्पर्धाले जिल्लामा धमाधम नयाँ गाडी भित्राएका हुन् ।

प्यूठानका दुई प्रा ली ले ७ महिनाको अवधिमा ११ करोड ५० लाखको १२ वटा एसी सुपर डिलक्स बसहरू भित्राएका छन् । स्वर्गद्वारी गौमुखी प्रा ली ले ९५ लाख पर्ने ७ वटा र नमस्ते प्यूठान प्रा ली ले ९७ लाख पर्ने ५ वटा नयाँ सुपर डिलक्स बस भित्र्याएका छन् । यातायात व्यवसायीहरूको प्रतिस्पर्धाले विशेष गरेर काठमाडौँ जाने-आउने यात्रुलाई सहज भएको सेवाग्राहीहरू बताउँछन् ।

दुई वटा यातायात व्यवसायीको प्रतिस्पर्धा बढेसँगै यातायात सेवाको गुणस्तर बढेको झिमरुक गाउँपालिका १ बाँदिकोटका विमल पोख्रेलले बताए । । ‘एसी र सोफा सिट । बसमा ३ कर्मचारी  । कर्मचारीलाई अझै तालिम दिनुपर्ने देखिए पनि राम्रो व्यवहार भयो,’ पोख्रेलले भने, ‘बसमा सबै यात्रुलाई पानी, बिस्कुट र फ्रुटी दिइन्छ । तिहारको भिडमा पनि क्षमता भन्दा धेरै यात्रु  खनिए पनि सेवा राम्रै दिएका छन् ।’

२०६० मा सङ्घसंस्था दर्ता ऐनअन्तर्गत दर्ता भएको स्वर्गद्वारी सार्वजनिक यातायात अहिले स्वर्गद्वारी गौमुखी यातायात प्रा.ली. नामबाट सञ्चालित छ । २०७३ मा सरकारले यातायातको सिन्डिकेट खारेज गरेसँगै नमस्ते प्यूठान यातायात प्रा.ली. सञ्चालनमा आएको थियो । कोरोना सङ्क्रमणपछि दुवै कम्पनीले आपसी सहकार्यमा पुराना बसहरूबाट सेवा प्रवाह गर्दै आएका थिए ।

गत वर्ष आपसी विवादका कारण दुई कम्पनीको सम्झौता भङ्ग भएपछि अलग-अलग सेवा दिन थाले । त्यस यता जिल्लामा सुविधायुक्त सुपर एसी डिलक्स बसहरू भित्रिन थालेका हुन् । यात्रुको सुविधाको लागि सुपर एसी डिलक्स बसहरू भित्र्याइएको नमस्ते प्यूठान यातायात सेवा प्रा.लि.का कार्यालय प्रमुख दिल बहादुर दसौदीले बताए । ‘नेपालमा लन्च भएका स्तरीय अन्य गाडीहरू पनि हेरी रहेका छौँ’ दसौदीले भने ।  नमस्ते  सेवा प्रा लीको  प्युठानबाट काठमाण्डौंका लागि दैनिक १ डिलक्स अर्को सुपर डिलक्स गाडी छुट्ने गरेको छ । स्वर्गद्वारीको २ वट डिलक्स १ वटा सुपर डिलक्स बस छुट्ने गरेको स्वर्गद्वारी गौमुखी यातायात सेवा प्रा.लि.का अध्यक्ष चन्द्रमान श्रेष्ठ बताए ।