नौबहिनी गाउँपालिका ८, लुप्लुङमा राष्ट्रिय सङ्ग्रहालय निर्माण हुने भएको छ ।

ऐतिहासिक तथा पुरातात्त्विक सम्पदाको संरक्षण र अध्ययनका लागि धनञ्जय सङ्ग्रहालय निर्माण गर्न थालिएको लुप्लुङ, झुलेनी बराह«क्षेत्र संरक्षण केन्द्रका महासचिव धनेश्वर भण्डारीले बताए । धनञ्जय गोत्रीय भण्डारीहरू उद्गम स्थल मानिएको लुप्लुङमा निर्माण हुन उक्त सङ्ग्रहालयमा धनु र मनुसँग जोडिएका ऐतिहासिक तथा पुरातात्त्विक बस्तुहरू सङ्ग्रह गरिनेछ ।

लुप्लुङलाई पर्यटकीय स्थलको रूपमा विकास लागि विभिन्न पूर्वाधार निर्माणका लागि ५ करोड बढीको डिपिआर तयार पारिएको छ । सोही डिपिआर अन्तरगतको महत्त्वपूर्ण अंश मानिएको सङ्ग्रहालय करिब १ करोड लागतमा निर्माण हुने लुप्लुङ योजना बनेको झुलेनी बराह क्षेत्र संरक्षण केन्द्रका अध्यक्ष शोभाराम भण्डारीले बताए । सङ्ग्रहालय निर्माणका लागि लुम्बिनी प्रदेश सरकारले चालु आर्थिक वर्षमा पर्यटन डिभिजन कार्यालय मार्फत २० लाख बजेट विनियोजन गरेको छ । थप श्रोतका लागि स्थानीय तह शुभेच्छुकहरूबाट जुटाउने योजना रहेको अध्यक्ष भण्डारीले बताए ।

पश्चिम नेपालको जुम्ला, दैलेख हुँदै लुप्लुङ आउने क्रममा पुर्खाले लिएका ऐतिहासिक बस्तुहरू, ठेका, मदानी, हुक्कका चिलिम, धनुकाण, डोका, घण्ट लगायतका सामग्रीहरू समेत सङ्ग्रहित हुनेछन् । सङ्ग्रहालय निर्माणले ऐतिहासिक जीवनशैलीको अध्ययनका लागि टेवा पुग्ने विश्वास लिइएको भण्डारीले बताए ।