नेकपा माओवादी केन्द्रका उपमहासचिव एवं पूर्व अर्थमन्त्री वर्षमान पुनले सत्तारुढ नेपाली काँग्रेस र नेकपा एमालेबिच सत्ता सञ्चालनमा समस्या देखिए पनि माओवादी केन्द्र सरकार ढलोस् भन्ने पक्षमा नरहेको बताएका छन् । सोमबार प्यूठानको जुम्रीमा पत्रकारहरू सँग कुरा गर्दै नेता पुनले काँग्रेस एमालेका नेताहरू वर्तमान सहकार्यबाट धेरै अगाडी जान नसकिने निष्कर्षसहित नयाँ ढङ्गले अगाडी बढ्ने पक्षका सन्देश पठाएको जिकिर गरे ।

‘माओवादी केन्द्र वर्तमान सत्ता गठबन्धन २०८४ सम्मै जावस भन्नेमा छ ।’ नेता पुनले भने–‘तर, उहाँहरूको बिचमा समस्या देखिएको छ । त्यो उहाँहरूले नै भन्ने गर्नुहुन्छ ।’ माओवादी केन्द्र भने यो कार्यकाल भरी यही गठबन्धन अगाडी जाओस् भन्नेमा रहे पनि प्रतिपक्षमा रहेको शक्ति स्वाभाविक हिसाबले वर्तमान सरकारको विकल्प हुने गरेको उनको जिकिर छ । स्वार्थका कारण यो गठबन्धन बनेकाले दुई नेताको स्वार्थ नमिल्दा दिन यो गठबन्धन नरहने उनले बताए ।

रवि लामिछानेको बचाउमा माओवादी लागेको भन्ने पत्रकारको प्रश्नमा नेता पुनले रवि लमिछानेमाथी छानबिन हुनु हुँदैन भन्नेमा माओवादी नरहेको बताए । ‘सबैमाथि छानबिन हुनुपर्छ भन्ने हाम्रो धारणा छ । तर, रातारात हिँडाउने, जिल्ला जिल्ला घुमाउने जे देखिएको छ, त्यसमा मानवअधिकारको सुनिश्चित गरिनुपर्दछ र सत्ताको दुरुपयोग हुनु हुँदैन भन्ने मान्यता हो’ पुनले स्पष्ट पारे ।

वर्तमान राजनीतिमा देखिएका समस्याहरूको समीक्षा गरेर लोकतन्त्रको कोर्सलाई थप सुदृढ बनाउँदै जानुपर्ने उनले औँल्याए । कमजोरीहरूबाट सच्चिएर नयाँ ढङ्गले अगाडि जानुपर्नेमा माओवादी केन्द्र स्पष्ट रहेको बताउँदै नेता पुनले सरकारका गलत कार्यहरूको विरोध गरिने बताए ।

प्रेस सेन्टर नेपाल जिल्ला समन्वय समिति प्यूठानले आयोजना गरेको पत्रकार भेटघाट कार्यक्रममा नेकपा माओवादी केन्द्रका केन्द्रीय सदस्य तथा पूर्व अर्थमन्त्री कृष्णध्वज खड्का, नारायण अधिकारी, कृष्ण अधिकारी, प्रभात केसी लगायतको आथित्यता रहेको थियो । टिकाराम पोख्रेलको अध्यक्षतामा भएको कार्यक्रमको सञ्चालन हरिप्रसाद भण्डारीले गरेका थिए भने स्वागत यादव पौडेलले गरेका थिए ।