२०८२ जेठ २१पर्यटकीय तीर्थस्थल स्वर्गद्वारी पुग्ने सडक अन्तर्गत रुमालेको होमस्टेले पाहुनाको मन जित्दै छ । जिल्ला भित्र मात्र नभएर जिल्ला बाहिरबाट आएका पाहुनाहरूले हिजोआज होमस्टे भरिभराउन हुन थालेको छ ।
स्थापना भएको ४ महिनामै होमस्टेले पाहुनाको मन जित्दै छन् । एक पटक बास बसेपछि पुनः होमस्टेमा बास बस्न आउनेहरू बढ्दै गएको स्थानीय बताउँछन् । पारिवारिक वातावरणमा रमाउन रुमाले बस्न जाने बढेका छन् । स्वर्गद्वारी मन्दिर दर्शन गर्न आएका पर्यटकहरू रुमालेको होमस्टेमा बास बसेर बिहानै स्वर्गद्वारी मन्दिर पुग्छन् । स्वर्गद्वारी लालीगुराँस महिला सामुदायिक होमस्टेको नामबाट होमस्टे सञ्चालनमा ल्याइएको छ । स्वर्गद्वारी मन्दिर नजिकै २५ वटा घरमा होमस्टे बनाएको छ । स्वर्गद्वारी नगरपालिका ३ रुमाले, डाडाखर्क र थाम गाउँका जनजाति महिलाहरू मिलेर होमस्टे सञ्चालनमा ल्याएका हुन् ।
स्वर्गद्वारी मन्दिर देखी भिंग्री तर्फ २ किलोमिटरको दुरीमा रहेको उक्त गाउँमा आज भोली नयाँ-नयाँ पहुनाहरु देखिन्छन् । जसले गर्दा गाउँको रौनक बदलिएको छ । पाहुना आएपछि स्थानीय महिलाहरू मगर पोसाकमा सजिएर सेतो अक्षता, फूल माला र मादल बाँसुरीको तालमा स्वागत गर्छन् । स्थानीयले बास बस्न आएका पाहुनालाई गाउँको अर्ग्यानिक मकैको आटो, कोदोको ढिँडो ,सिस्नो ,गोलभेँडाको अचार ,गुन्द्रुक, लोकल कुखुरा र बोकाको मासु ,खुवाउने व्यवस्थामा मिलाइने स्थानीय चित्र बहादुर रोकाले बताए । पाहुनालाई स्थानीय लोक भाका मार्फत मनोरञ्जन गराउने रोकाले बताए । घरायसी काममा सधैँ व्यस्त हुने गाउँका महिलाहरू हिजोआज आम्दानी गर्न थालेको होमस्टे सञ्चालन समिति सचिव विना रोकाले बताइन । घर घरमा पानीको धारा, पक्की चर्पी रहेको गाउँमा पाहुना राख्ने कोठाहरू स्थानीयले सजाएर राखेका छन् । माघ महिना देखी सञ्चालन गरेको होमस्टेमा पोखरा, बुटवल, दाङ , रोल्पा लगायत जिल्लाबाट पर्यटक आएर बास बस्ने गरेको स्थानीय बताउँछन् ।
होमस्टेबाट रोजगारी अवसर सिर्जना भएपछि विदेशबाट फर्केर समेत होमस्टे सञ्चालन गर्न थालेका छन् । गाउँमा उत्पादन भएको कृषि उपजले मूल्य पाएको छ । यसले स्थानीयको आम्दानीको श्रोत बढेको छ । होमस्टेमा ७० जना बास बस्न सक्ने क्षमता छ । ७ लाख ५० हजार सङ्घीय सरकारको सशर्त कार्यक्रम अन्तर्गतको बजेट मार्फत भौतिक संरचना निर्माण गरेर होमस्टे स्थापना गरिएको वडाध्यक्ष कृष्ण बहादुर रोकायले बताए । रुमालेको होमस्टेमा गाउँले परिवेशमा बास बस्न सकिने गरी सञ्चालनमा रहेको प्यूठान जुम्रीका व्यवसायी मोहन बुढाले बताए । होमस्टेमा बास बस्न पुगेका दाङका शङ्कर अधिकारीले पुराना पारिवारिक संस्कार र संस्कृति झल्कने, परिवेशमा होमस्टे रहेको बताए । उनले होमस्टेमा खान बस्न पनि सस्तो रहेको बताए । जिल्लामा ऐरावतिको १ सिर्सेनी, स्वर्गद्वारी नगरपालिका ३ रुमाले, २ धन वाङ र गौमुखी गाउँपालिका २ को किनाम अर्खामा होमस्टे सञ्चालनमा छन् ।
हाम्रा सामाग्रीहरू झुलेनी युनाइटेड नेटवर्क प्रा.ली. द्वारा सञ्चालित निम्न सञ्चारमाध्यममा हेर्न, पढ्न र सुन्न सकिन्छ ।
