समुदाय स्तरमा कोरोना संक्रमण फैलिन थालेपछि प्युठानको व्यापारीक केन्द्र बाग्दुला बजारलाई सिल गरिएको छ।

प्युठान नगरपालिकाको वडा नं ७ र ८ क्षेत्रलाई पाँच दिनका लागि सिल गरीएको हो। बुधबार २३ वर्षीय युवतीलाई कोरोना संक्रमण देखिएपछि समुदाय स्तरमा कोरोना फैलिएसंगै प्युठान नगरपालिकाले पाँच दिनका लागि बजार सिल गर्ने निर्णय गरेको हो। नगरपालिका स्तरीय सि सि एम सि को निर्णय अनुसार प्युठानको स्वर्गद्वारी बहुमुखी क्याम्पस पुण्यखोला देखि सारीवाङ देखि मरन्ठाना खरीबोट हुँदै धाइरे क्षेत्रसम्मलाई सिल गरिएको हो।

जिल्लामा संक्रमण कम गर्नका लागि पि सि आर जाचको दायरा बढाउने र यश क्षेत्रमा रहेका होटेल उद्योग पसल सबै क्षेत्रलाई बन्द गर्नका लागि ध्यानाकर्षण गराउने प्युठान नगरपालिकाका प्रमुख अर्जुन कक्षपतिले जानकारी गराउनु भयो। बिहिवार बिहान देखि उनको सम्पर्कमा आएका व्यक्तिहरुको कन्ट्याक्ट् ट्रेसिङ गरिने प्रमुख जिल्ला अधिकारी कृष्ण प्रसाद पन्थले बताउनु भयो।

कोरोना सम्बन्धि सुरक्षा सावधानी अपनाउन सकेमा कोरोना संक्रमणको महामारीबाट वचन सकिने प्युठान जिल्लाका प्रहरी प्रमुख नरेन्द्र कार्कीको भनाइ छ। उहाँले घर बाहिर निस्कदा हरेक नागरिकहरुले अनिवार्य रूपमा मास्कको प्रयोग गर्न र धेरै मान्छे एकैठाउँमा भिडभाड नगर्न आग्रह गर्नुभएको छ।

आफुले गर्ने दैनिक क्रियाकलापहरुमा स्वायं आफैले नै सुरक्षा सतर्कता अपनाउनु पर्नेमा स्वास्थ्य कार्यालय प्युठानका प्रमुख विशाल सुवेदीले जोड दिनु भयो।