प्यूठान, १२ साउन । सरुमारानी गाउँपालिकाका ५ जनालाई अबैध काठ कारोवारमा संलग्न रहेको आरोपमा डिभिजनल वन कार्यालय प्यूठानले मुद्धा चलाएको छ । सरुमारानी गाउँपालिकाको कालीवन सामुदायिक वनबाट विना स्विकृती काठ कटान गरेको आरोपमा कार्यालयले जिल्ला अदालत प्यूठानमा मुद्धा दायर गरेको सहायक वन अधिकृत दिपक केसीले जानकारी दिनुभयो ।

कार्यालयका अनुसार ७६ थान चिरान सालको ४५.५५ क्युफिट अवैध काठ बरामत गरेको हो । अवैध काठ काटी लुकाइ छिपाई राखेको सुचना प्राप्त भएको आधारमा वडा नं. १ का अभियुक्त अशोक गुरुङको घरमा खानतलासी गर्दै जाँदा उनी सहित अन्य ४ जना गरी ५ जना घटनामा संलग्न भएको पुष्टि भएको थियो ।

त्यस्तै अन्य अभियुक्तहरुमा द्रोण बहादुर सुनार, दुर्गा बहादुर बि.क. सुनार, बोम बहादुर कुमाल र वडा नं. ३ का सन्तोष कुमार बि.क. रहेका छन । अनुसन्धानका क्रममा लु ४ त १७ ३२ को ट्याक्टर समेत काठ ओसारपसार गरेको आरोपमा नियन्त्रणमा लिइएको छ । यिनीहरुलाई २६ दिन अँघि अनुसन्धानका लागि पक्राउ गरी आइतवार जिल्ला अदालत प्यूठानमा मुद्धा दायर भएको हो । अभियुक्तहरुले घर नजिकै बारीमा माटो मुनी गाडेर काठ राखेको अवस्थामा अवैध काठ फेला परेको हो ।