२०७८ भाद्र ११ प्यूठानएमाले नेता माधव नेपालले एमाले फूटाएर नेकपा एकीकृत समाजवादी पार्टी निर्माण गरेपछि प्यूठानमा एमालेको फुटको असर सामान्य देखिएको छ । २०१ सदस्य जिल्ला कमिटि मध्ये ३ जना बाहेक सबै एमालेमै खुलेका छन् । जनवर्गिय संघ संगठनमा पनि फुटको असर खासै देखिएको छैन् ।
नेकपाबाट एमाले ब्युतिएपछि माधव नेपाल नेतृत्वमा समानान्तर कमिटि गठन हुॅदा तीन जना जिल्ला कमिटि सदस्य समानान्तर कमिटिमा बसेका थिए । सो बेला भोजबिक्रम बुढा मगरको संयोजकत्वमा ६९ सदस्यीय समानान्तर कमिटि गठन भएको थियो । पार्टी फुटेपछि उनीहरु समेत खुलेका छैनन् । अहिले विधिवत रुपमा निर्वाचन आयोगमा नयाँ पार्टी बनेपछि पनि जिल्लामा एकीकृत समाजवादी पार्टीमा जानेहरुको संख्या नगन्य छ ।
जिल्लाको ९ स्थानीय तहमध्ये एमालेले ३ वटा गाउँपालिका र २४ वटा वडा अध्यक्षमा जितेको थियो । यि सबै जनप्रतिनिधि संस्थापन नेकपा एमालेमा खुलेरै लागेको एमाले जिल्ला कमिटि अध्यक्ष तुल्सीराम शर्माले बताए । संस्थापन पक्षसँग बिद्रोह गरी समानान्तर कमिटि बन्दा देखि अहिले नयाँ पार्टी गठन हुँदासम्म निर्वाचित जनप्रतिनिधि नयाँ पार्टीमा खुलेर देखिएका छैनन् । प्यूठान नगरपालिका उपमेयर र एकजना वडा सदस्यले आफुहरु तटस्थ रहेको बताउँदै आएका छन ।
