लगातार वर्षाका कारण गएरातीदेखि भालुवाङ प्यूठान सडक खण्ड अवरुद्ध छ । लगातार पानी परिरहेकोले भालुवाङ प्युठान सडक खण्डको थुप्रै ठाउँमा पहिरो जाँदा सडक अवरुद्ध भएको हो । सडक अबरुद्ध हुँदा जिल्ला भित्रिने र जिल्ला बाहिरिने गाडी बिच बाटोमै रोकिएका छन् । सरुमारानी गाउँपालिकाको बड्डादेखि प्यूठान तर्फका ५/७ ठाउँमा सडक अवरुद्ध हुने गरी पहिरो गएको छ ।

गर्जेनी, खहरेखोलो लगायतका ठाउँमा पहिरो जाँदा सडक अवरुद्ध रहेको जिल्ला प्रहरी कार्यालय प्यूठानले जनाएको छ । लगातारको वर्षा र सडक अवरुद्धका कारण यात्रुहरु समयमै गन्तब्यमा पुग्न सकेका छैनन । सानो पहिरो गएको ठाउँमा यात्रुहरु र स्थानीयले सवारी धकेलेर सुरक्षीत ठाउँमा पुर्याउने प्रयास गरीरहेका छन ।  त्यसैगरी सडक डिभिजनसँग समन्यव गरेर जेसिवि मार्फत पहिरो खुलाउने प्रयास जारी रहेको प्यूठान प्रहरी प्रमुख शुनिल मल्लले जानकारी दिए । पहिरो गएको अधिकांस ठाउँमा प्रहरी पुगेको छ ।