२०७८ पुस १८, प्यूठाननिर्माण व्यवसायी संघ प्यूठानको बिजुवारमा निर्माण सम्पन्न भएको भवनको शनिबार उद्घाटन भएको छ । प्यूठान नगरपालिका ४ बिजुवार स्थित इलाका प्रहरी कार्यालय नजिकै भवनको नेपाल निर्माण व्यवसायी संघका केन्द्रीय अध्यक्ष रबी सिंहले उद्घाटन गरेका हुन् ।
भवन निर्माणका लागि संघका केन्द्रिय अध्यक्ष विष्णुभाई श्रेष्ठले २०७४ साल फागुनमा शिलान्यास गरेका हुन् । २०५६ सालमा हिरा बहादुर थापाको अध्यक्षतामा स्थापना भएको निर्माण व्यवसायी संघ प्यूठान हालसम्म कोठा भाडामा लिएर कार्यालय सञ्चाल गर्दै आएको थियो ।
२०६३÷०६४ सालमा करिब ३ लाख ५० हजार रुपयाँमा संघले जग्गा खरिद गरेको थियो । करिव १ करोड लागतमा ९ कोठे भवन निर्माण भएको, भवन निर्माण समिति संयोजक बालाजु श्रेष्ठले जानकारी दिए । श्रेष्ठका अनुसार बैठक कक्ष १ सहित पदाधिकारी कार्यकक्ष छुट्टाछुट्टै बनाइएको छ ।
सचिवालय सञ्चालन गरेर बाँकी रहेका कोठाहरु भाडामा दिन सकिने निर्माण व्यवसायी संघले जनाएको छ । संघमा आवद्ध हुन निर्माण व्यवसायी समितिबाट लिने शुल्क, नविकरण शुल्क, व्यवसायीले दिएको चन्दाबाट भवन निर्माण सम्पन्न भएको निर्माण व्यवसायी संघ प्यूठानका अध्यक्ष पशुपती नरायण नकर्मीले जानकारी दिए ।
