प्यूठान नगरपालिकामा सबै कार्यपालिका सदस्य निर्विरोध निर्वाचित भएका छन् । निर्वाचन अधिकृतको कार्यालयले निकालेको कार्यपालिका सदस्य चयनसम्बन्धी तालिकाअनुसार जेठ १२ मनोनयन दर्ता गर्ने समय थियो । नेकपा एमालेबाहेक नेपाली काँग्रेस, रा.ज.मो र माओवादी केन्द्र दलहरूले कार्यपालिका सदस्यका लागि मनोनयन दर्ता गरेका थिए । नगरपालिकामा गठबन्धनका ५ महिला र ३ अल्पसंख्यक सदस्यहरू निर्विरोध निर्वाचित भएका हुन् ।

नगरपालिकाका निर्वाचन अधिकृत कृष्ण बहादुर वलीका अनुसार १२ गते कार्यपालिका सदस्यहरूको मनोनयनपत्र दर्ता गर्ने तालिका रहेकोमा गठबन्धनका ८ जना सदस्यको मनोनयन दर्ता भएको थियो । अन्य दलहरू भने मनोनयन दर्ता गराउन नआएको निर्वाचन अधिकृतको भनाई छ ।

उक्त नगरपालिकामा नगरप्रमुख विष्णु योगी र उपप्रमुख देवेन्द्र वर्मा सहित ७ वटा वडाहरू गठवन्धनले जितेको छ । बाँकी २ वडामा नेकपा एमाले र १ वडामा स्वतन्त्र तर्फका उम्मेदवारले जितेको छ ।

महिला सदस्यतर्फ गायत्री रावत नेपाली कांग्रेस, लाली घर्तीमगर रा.ज.मो, दुर्गा केसी माओवादी केन्द्र, शान्ता खड्का मगर, गिता भण्डारी र दलित अल्पसंख्यकतर्फ काली बहादुर सार्की नेपाली कांग्रेस, सुनिल सापकोटा माओवादी केन्द्र र मिन बहादुर सार्की राजमोबाट निर्वाचित भएका छन् । कार्यपालिका सदस्यमा निर्वाचित सदस्यहरुले सोमबार नै प्रमाणपत्र प्राप्त तथा पदभार ग्रहण गरिसकेका छन ।

नगर कार्यपालिकामा प्रमुख, उपप्रमुख र प्रत्येक वडाबाट एक÷एक जना वडाध्यक्ष रहन्छन् । नगर सभाले सभाका सदस्यहरूमध्येबाट निर्वाचित पाँच जना महिला र अन्य तीन जना दलित वा अल्पसंख्यक पनि कार्यपालिकाको सदस्य रहने व्यवस्था गरेको छ । त्यस्तै गाउँ कार्यपालिकामा अध्यक्ष, उपाध्यक्ष र प्रत्येक वडाबाट एक/एक जना वडाध्यक्ष रहने व्यवस्था छ । यसबाहेक गाउँ सभाका सदस्यमध्येबाट चार महिला र अन्य दुई दलित वा अल्पसंख्यक समुदायबाट कार्यपालिका सदस्यमा निर्वाचित हुने व्यवस्था गरेको छ ।