दशा बनेर आएको दशै,
खुसिले बिदा गर्दै थियो।
लाग्छ उसको नसिबमा,
कहिल्यै खुसी लेखेकै छैन।
बढ्दो महँगाइ,
बेरोजगारी परिवार,
रोग भोग र शोक,
खाली उसले भोगेको छ।
इमान र इज्जतले बाच्न चाहान्छ ऊ,
मैलो हातले,
धेरै पटक मतपत्रमा छाप हानिसक्यो,
उस्को छापले सत्ता बदलियो।
तर,बिडम्बना,
उसको जिवन बदलिएन।

छोरालाई धेरै पढाउने सपना,
छोराले जागिर गरेको देख्ने सपना,
बाजा बजाएर छोरिको बिहे गर्दिने सपना,
श्रीमती र छोरीको बुच्चे कान भर्दिने सपना,
बर्षदिनमा एक जोर कपडा फेर्ने सपना,
सपना उसको सपनै रह्यो,
भगवानले उसको सहनशीलताको परीक्षा,
पटक पटक लिएका छन्।

सधैं धेरै अङ्क लिएर पास भएको छ ऊ,
तर उसको आजको परिक्षा फरक छ,
आज दैवले फेरि कठोर परिक्षा लिदैछ्न।
यो परिक्षामा पनि पास गराउनु छ,
किसानलाई हौसला दिनु छ।
हाम्रो साथको खाँचो छ उसलाइ,
भगवानलाई यो देखाउनु छ कि,
किसान एक्लो छैन।
सम्पुर्ण नेपाली किसानको साथमा छ।