प्यूठानमा हिजो करिब १० हजार लिटर दुध बिक्री भएको छ । दुग्ध संकलन तथा बिक्री केन्द्रका अनुसार जिल्लाका विभिन्न बजार क्षेत्रका डेरिहरुबाट प्रतिलिटर ९० का दरले करिब १० हजार लिटर दुध बिक्री भएको हो ।

हिजो साउन १५ गते खिर खाने दिन, परम्परागत तथा चलनचल्ती अनुसार जिल्लामा पनि खिर खाएर साउन १५ मनाइएको छ । विशेष गरि खिर खाने दिन भएकाले अन्य दिनको तुलनामा हिजो बिजुवार, जुर्मी, क्वाडी, बाग्दुला लगाएत जिल्लाका मुख्य बजार क्षेत्रका डेरीहरुबाट करिब १० हजार लिटरको हारहारीमा दुध बिक्री भएको दुग्ध संकलन तथा बिक्री केन्द्रका संचालकहरुले बताए ।

सोही अनुसार प्यूठान नगरपालिका ४ जुर्मी स्थित किसान डेरीबाट मात्रै आईतबार १ हजार लिटर दुध बिक्री भएको डेरिका संचालक नारायण घिमिरेले बताए ।
जिल्लामा दुग्धजन्य उत्पादन थोरै मात्रामा भएकाले बाहिरी जिल्लाबाट दुध आयात गरिदै आएको उनको भनाई छ । उनले भने, दाङ्ग, कपिलवस्तु लगाएतका स्थानबाट दुध आयात हुदै आएको छ । उनको डेरिमा दैनिक १सय५० लिटरको हारहारीमा स्थानिय दुध आउने गरेको बताए ।

त्यस्तै प्यूठान नगरपालिका ४ स्थित बिवेन्सु दुग्ध संकलन तथा बिक्री केन्द्र बिजुवारबाट हिजो करिब ५सय लिटर दुध बिक्री भएको दुध बिके्रता विरबल धामीले बताए ।
यस्तै जिल्लाका अन्य डेरिहरुबाट करिब १० हजार लिटरको हारहारीमा दुध बिक्री भएको अनुमान गरिएको छ ।

प्यूठान जिल्लाको सन्दर्भमा हेर्दा ग्रामीण क्षेत्रका धेरै जसो किसानहरुले गाई भैसी पालेर दुध उत्पादन गरेता पनि भौगोलिक विकटता, नियमित चल्ने सवारी साधनको अभाव र जिर्ण सडकका कारण बजार क्षेत्रमा ल्याउन सकिएको छैन । स्थानिय निकायले समयमै सडक सुधार गर्ने हो भने दुग्धजन्य उत्पादन तथा बिक्रीबाट जिल्लालाई आत्मनिर्भर बनाउन सकिने दुग्ध संकलन तथा बिक्री केन्द्रका संचालकहरु बताउछन् ।