२०८० चैत्र ३प्यूठानका संघिय सांसद सूर्य थापाले चुनाबको बेलामा आफु फरक पार्टीको भएपनि अहिले सांसद भईसकेपछि साझा सांसदको रुपमा उभिएको बताएका छन् । शनिबार प्यूठान उद्योग बाणिज्य संघको २६ औं बार्षिक साधारण सभामा बोल्दै सांसद थापाले यस्तो बताएका हुन् । आस्थाको लागि फरक पार्टी भएपनि गर्ने काम र तरिकामा कुनै पार्टी हुन नहुने सांसद थापाको भनाई थियो । काम गर्ने सुइको सुनाउनु भन्दा कामको जस लिने गरी राजनीति गर्न पनि सांसद थापाले राजनीतिकर्ताहरुलाई आग्रह गरेका छन् । साथै थापाले फरक प्रसंगमा अहिले नयाँ सत्ता गठबन्धन बनेपछि सूर्य थापा किन मन्त्री नबनेको भन्ने धेरैको प्रश्नको जवाफ दिदै यसको लागि २ कार्यकाल मन्त्री हुनुपर्ने भएकाले आफु अहिले मन्त्रीको दाबेदारमा नपुगेको बताए । मन्त्री बन्नको लागि २ पटक चुनाब जित्नुपर्ने बताउँदै अर्को पटक आफु निर्वाचित भए मन्त्री बन्ने त्यो हैसियतमा पुग्ने उनको भनाई थियो ।
कार्यक्रममा प्रगति प्रतिवेदन महासचिव सन्देश आचार्य, कोषाध्यक्ष झवेन्द्र शर्माले आर्थिक प्रतिवेदन प्रतिवेदन प्रस्तुत गरेका थिए भने कार्यक्रमको सहजिकरण महासचिव सन्देश आचार्यले गरेका थिए । साथै कार्यक्रममा २५ जना आजिवन सदस्यलाई प्रमाणपत्र, संघको नयाँ एशोसियट सदस्यलाई प्रमाणपत्र, उत्कृष्ट व्यवसायी र स्थानीय तहमध्ये उत्कृष्ट बजार क्षेत्रका रुपमा नौबहिनी गाउँपालिका बजार क्षेत्रलाई सम्मान गरेको छ । प्यूठान उद्योग बाणिज्य संघका अध्यक्ष पशुपति नारायण नकर्मीको अध्यक्षतामा साधारण सभा संचालन भएको हो ।
कार्यक्रममा लुम्बिनी प्रदेशका सांसद धनालक्ष्मी श्रेष्ठ, नेपाल उद्योग बाणिज्य संघका केन्द्रिय सदस्य केशब भण्डारी, नेपाल उद्योग बाणिज्य संघ लुम्बिनी प्रदेश अध्यक्ष कृष्ण प्रसाद शर्मा, नेपाल पुस्तक संघका अध्यक्ष रमेश गिरी, प्यठान प्रमुख जिल्ला अधिकारी नारायण प्रसाद अर्याल, प्यूठान नगरपालिकाका संस्थापक नगरप्रमुख अर्जुन कुमार कक्षपति, नेपाल पत्रकार महासंघ जिल्ला शाखा प्यूठानका अध्यक्ष सञ्जय रिजाल, प्यूठान उद्योग बाणिज्य संघका पूर्व अध्यक्ष इमानसिंह भारती, माण्डवी गाउँपालिकाका अध्यक्ष नमराज अधिकारी, सिसहनिया उद्योग बाणिज्य संघ दाङका अध्यक्ष पूर्णप्रसाद बुढाथोकी लगायतले कार्यक्रममा शुभकामना मन्तव्य राखेका थिए ।
