नेपाल टेलिकमले संविधान दिवसको अवसरमा प्यूठान अस्पताललाई सामाग्री सहयोग गरेको छ ।

टेलिकमको संस्थागत सामाजिक उत्तरदायित्व (सिएसआर) कार्यक्रम अन्तरगत बेड (बेड कम चियर) सहयोग गरेको नेपाल टेलिकम तुलसीपुरका प्रमुख  सन्तोष शर्माले बताए ।

टेलिकमले प्यूठान अस्पतालमा १० वटा बेड कम चियर हस्तान्तरण गरेको हो । अस्पतालमा आउने बिरामी तथा कुरुवाहरूलाई बास बस्न सहजताका लागि बेड सहयोग गरेको प्रमुख  शर्माको भनाई छ ।

प्यूठान अस्पताल विकास समितिका अध्यक्ष विजय बिराज विष्टले नेपाल टेलिकमले गरेको सहयोग महत्त्वपूर्ण रहेको भन्दै सहयोगका निम्ति धन्यवाद दिए ।

प्यूठान नगरपालिकाका मेयर विष्णु बहादुर योगीको प्रमुख आथित्यता रहेको कार्यक्रममा अतिथिहरू प्यूठान नगरपालिकाका उपमेयर देवेन्द्र वर्मा, नगरपालिकाका प्रवक्ता सुमनराज श्रेष्ठ, प्यूठान अस्पतालका मेडिकल सुपरिटेन्डेन्ट डा. राजेन्द्र पौडेल, नेपाल टेलिकम केन्द्रीय कार्यालयका व्यापार अधिकृत कृष्ण प्रसाद पौडेल, दूरसञ्चार कार्यालय बिजुवारका कार्यालय प्रमुख निरञ्जन श्रेष्ठ लगायतको उपस्थित रहेको थियो ।

कार्यक्रमको सञ्चालन नेपाल टेलिकमका सहायक व्यापार अधिकृत वेद प्रसाद पौडेलले गरेका थिए भने स्वागत मन्तव्य प्यूठान अस्पतालका डाक्टर आमिर काफ्लेले राखेका थिए ।