प्यूठान नगरपालिकाले फोहोरबाट १२ लाख भन्दा बढी रकम स्थानीय सँग शुल्क उठाएको छ । कोभिडको समयमा रोकिएको शुल्क समेत गरी २५ लाखको लक्ष्य राखिएकोमा १२ लाख ५० हजार ४ सय ५० रुपैयाँ राजस्व सङ्कलन गरेको राजस्व शाखा प्रमुख वर्षा पाण्डेले बताइन । कोभिडको कारणले रोकिएको शुल्क समेत गरी गत आर्थिक वर्षमा यो राजस्व सङ्कलन गरेको हो ।

नगरपालिकाले फोहोर उठाएबापत बजार क्षेत्रका प्रत्येक घर बाट एक सय रुपैयाँ शुल्क लिने गर्दछ । उक्त रकम क्वाडि जुम्री र बिजुवार बजार क्षेत्रबाट उठेको नगरपालिकाले जनाएको छ । बाग्दुला, खप्रेङखोला,दम्ती र मरन्ठाना बजार क्षेत्रबाट रकम उठ्न बाँकी रहेको शाखा प्रमुख पाण्डेले बताइन् ।

प्यूठान नगरपालिकाले फोहोर व्यवस्थापनको दिगो समाधानका लागि वैकल्पिक स्थान अध्ययन गरिरहेको प्यूठान नगरपालिकाका मेयर विष्णुबहादुर योगीले बताए । फोहोर व्यवस्थापनका लागि नगरपालिकाले वार्षिक ६ लाख रुपैयाँ बजेट विनियोजन गर्दै आएको  छ । तर, नगरपालिकाको फोहोरबाट  मोहर आम्दानी गर्न भने सकेको छैन । अहिले पुरानै ठाउँबाट फोहोर व्यवस्थापन गरिँदै आएको छ । थप अरू ठाउँहरूमा पनि डम्पीङ साइड अवलोकन गरिएको योगीले बताए । निश्चित ठाउँ,दक्ष प्राविधिक र श्रोतको अभावका कारण पोहोर व्यवस्थापन गरेर आम्दानी गर्न नसकिएको मेयर योगीले बताए ।

प्यूठान नगरपालिकाले फोहोर व्यवस्थापनको लागि दैनिक एउटा टिप्पर सञ्चालन गर्दै आएको छ । फोहोर व्यबस्थापनकालागि ३ जना कर्मचारी खटाएको वातावरण तथा विपद् व्यवस्थापन शाखाका प्रमुख दिनेश केसीले बताए । नगरपालिकाले बिहान ६ बजे देखी दिउँसो २ बजेसम्म फोहोर सङ्कलन  गरिँदै आएको नगरपालिकाले जनाएको छ  ।