२२ औं विश्व रक्तदाता दिवसको अवसरमा प्यूठानमा रक्तदान गरिएको छ ।
मानव रगत समूह पत्ता लगाउने वैज्ञानिक कार्ल ल्याण्डस्टिनरको जन्मदिन जुन १४ को अवसर पारेर हरेक वर्ष १४ जुन मा विश्व रक्तदाता दिवस मनाउने गरिन्छ । सोही अवसरमा दिवसको पूर्वसन्ध्यामा प्यूठानमा रक्तदान कार्यक्रम गरिएको हो ।
रगत दिऔं, आशा जगाऔं, सबै मिलेर जीवन जोगाऔं, भन्ने मुल नाराका साथ कार्यक्रमको आयोजना गरी बुधवार ९ जनाले रगतदान गरेको नेपाल स्वयंमसेवी रक्तदाता समाजका केन्द्रिय सदस्य मनु लामाले जानकारी दिए ।
रक्तदाता समाजले कोहि पनि विरामी रगतको अभावमा मर्न नपरोस भन्ने उद्देश्यले विभिन्न समयमा मानव बचाऔं अभियानमा सहयोग गर्दै आएको लामाले बताए ।
नेपाल रेडक्रस सोसाइटी रक्तसन्चार केन्द्र प्यूठानको प्राविधिक सहयोग तथा नेपाल स्वयंमसेवी रक्तदाता समाज प्यूठानको आयोजनामा दिवसको अवसर पारेर रक्तदान कार्यक्रम गरिएको उनले बताए ।
विश्व स्वास्थ्य सङ्गठनको आह्वानमा सन् २००४ देखि यो दिवस मनाउन सुरु गरिएको हो । यस दिवसलाई रक्तदान दिवस भनेर पनि मनाउने गरिन्छ ।रगतको आवश्यकतालाई परिपूर्ति गर्ने रक्तदाताहरुको कदर स्वरूप नेपालमा पनि वि.सं. २०७० जेठ ३० र ३१ गते प्रथम रक्तदाता सम्मेलन समेत आयोजना गरिएको थियो ।