१३ माघ २०७९झिमरुक गाउँपालिकामा शुक्रबार एकै दिन ३ वटा बैठक सम्पन्न भएको छ । गोर्खा वेल्फेयर टष्ट्र नेपाल उत्थानशील खानेपानी सरसफाई, विपद व्यवस्थापन सम्बन्धि र गाउँपालिकाको गाउँकार्यापालिका बैठक गरि विभिन्न ३ तहमा बैठक एकै दिन सम्पन्न भएको झिमरुक गाउँपालिका अध्यक्ष पित बहादुर महतरा क्षेत्रीले जानकारी दिए ।
गोर्खा वेल्फेयर टष्ट्र नेपाल उत्थानशील खानेपानी सरसफाई कार्य निर्देशकका तर्फबाट दिपक कुमार श्रेष्ठ र झिमरुक गाउँपालिका अध्यक्ष महतरा क्षेत्रीको हस्ताक्षरमा सम्पन्न भई सम्झौता पत्र आदन प्रदान भएको हो । बिशेष गरेर यो सम्झौता स्वच्छ खानेपानी सँग सम्बन्धित भएको उनले बताए ।
सो बैठकले विभिन्न ५ बुदामा सम्झौता पत्रको उदेश्य सहित पारित गरेको छ ।
(१) खानेपानी सरसफाई तथा स्वच्छता सम्बन्धि योजना बनाउने
(२) खानेपानी तथा सरसफाई सम्बन्धि पूर्वाधार निर्माण गर्ने
(३) व्यवहार परिवर्तनको माध्यमबाट सुरक्षित खानेपानी सरसफाइ तथा आपतकालिन पूर्व तयारी सम्बन्धि ज्ञान र सीपको बिकास गराउने
(४) आपतकालिन तयारी तथा प्रतिकार्य योजना बनाउने
(५) अनुगमन, मुल्याङ्गकन तथा सीप र अनुभवको विस्तार गर्ने गरि योजना बनाउने
साथै सन २०३० सम्म दिगो बिकास लक्ष्य पुरा गर्नको लागि कोसे ढुङ्गा सावित हुने समेत बताए । सन २०३० सम्म झिमरुक गाउँपालिका भित्र रहेका ६ हजार १३० घरधुरीले “एक घर, एक स्वच्छ ” पिउने पानीको धारा अवधारणा अनुसार पानी पिउन पाउने जानकारी गराए । साथै हाल यसै चालु आर्थिक बर्ष भित्र सम्पन्न हुने गरि गाउँपालिकाले ४ वटा खोनपानी आयोजना सम्पन्न गर्ने भएको छ । आयोजनामा स्नाथान नुनथला खानेपानी आयोजना वडा नं ८, गैराडाँडा खानेपानी तथा सिम्लिनी खानेपानी आयोजना वडा नं ३ र वडा नं ४ को आयोजना रहेका छन् ।
त्यस्तै विपद व्यवस्थापन कोष सञ्चालक समितिको बैठक पनि बसेको हो । बैठकले झिमरुक गाउँपालिका भित्र रहेका ८ वटै वडामा रहेका जोखिमयूक्त ठाउँहरुमा संभाव्यता अध्ययन गरि आकस्मिक रुपमा हुने कुनै पनि विपदको सामनाको लागि पूर्व तयारीका निम्ति विशेष कार्ययोजना बनाउने निर्णय भएको उनले जानकारी दिएका छन् ।
झिमरुक गाउँपालिका गाउँकार्यपालिकाको बैठक पनि शुक्रबार नै सम्पन्न भएको छ । बैठकले सडक बोर्ड मार्फत प्राप्त रहेको बजेट र गाउँपालिकाले २० प्रतिशत बजेट थप गरि बाटो निर्माण गर्ने निर्णय गरेको हो । सडक बोर्ड मार्फत १७ लाख र गाउँपालिकाको ३ लाख ४० हजार गरि कुल लागत २० लख ४० हजारमा बाडिखोला आरुपाटा र ओखरकोट खण्डको आरुपाटामा बाटो मर्मत गर्ने भएको छ । त्यस्तै विभिन्न पेश व्यवसायहरुलाई दर्ता प्रकियामा ल्याउन बाटो छेउमा बन्ने पक्कि संरचनाको हकमा गाउँपालिकाले तोकिए अनुसारको मापदण्डमा मात्र बनाउन पाउने भनिएको छ । झिमरुक गाउँपालिका समृद्धिको निमित्त सरोकारवाला सबै र विज्ञ सहितको टोलीबाट आगामी फागुन ८ र ९ गते बृहत कार्यशाला गोष्ठि सञ्चालन गर्ने निर्णय भएको गाउँपालिका अध्यक्ष महतरा क्षेत्रीले बताए । सो काम उपभोक्ता अनुसार फागुनको पहिलो हप्तादेखी सुरु गरि त्यहि महिनामै सकिने गरेर काम थाल्ने उनले जानकारी दिए ।
