श्रावण १५प्यूठान, प्युठान अस्पतालका स्वास्थ्यकर्मीहरु सम्मानित भएका छन् । जिल्ला अस्पताल बिजुवार प्यूठानमा सोमबार एक कार्यक्रमको आयोजना गरी स्वास्थ्यकर्मीहरुलाई सम्मान गरिएको हो। गत असार २५ गते सर्पको टोकाईबाट विरामी परेका प्युठान नगरपालिका १ खैराका २ जना बालबालिकाहरुको ज्यान बचाउन महत्वपुर्ण भुमिका खेलेको भन्दै खप्तडी बस्नेत कुलपुजा समिती परिवारले प्युठान अस्पतालका स्वास्थ्यकर्मीहरुलाई अस्पतालमै पुगेर सम्मान गरेका हुन ।
खप्तडी बस्नेत कुलपुजा समिती परिवारका अध्यक्ष चुमानसिङ बस्नेतले स्वास्थ्यकर्मीहरुलाई सम्मानपत्र र दोसल्ला ओढाएर सम्मान गरेका थिए । अध्यक्ष बस्नेतले स्वास्थ्यकर्मीहरुलाई धन्यवाद् दिदै समय मै स्वास्थ्यकर्मीको सक्रियता नभएको भए बस्नेत परिवारका दुई दिदीभाईलाई बचाउन नसकिने बताए । १४ बर्षिय बालिका करिना बस्नेत र ९ बर्षिय बालक करन बस्नेतलाई गत असार २५ गते आफ्नै घरमा सुतिरहेको बेला करेत सर्पले डसेको थियो ।
उनीहरुलाई प्युठान अस्पतालमा एन्टीस्नेक भेनम दिएर उपचार प्रक्रिया सुरु गरेपनि बिरामीको अवस्था निकै जटिल बनेपछि स्वास्थ्यकर्मीहरु स्वयंम बिरामीको निगरानीमा खटेर प्युठान अस्पतालबाट एम्बुलेन्समा राखी नेपालगंज लगेका थिए । नेपालगन्जबाट भेरी अस्पतालका सर्पदंस रोग बिशेषज्ञ डा.कृष्ण आचार्यलाई जिल्ला अस्पताल प्यूठानका डाक्टरहरुले बिरामीको अवस्थाको बारेमा जानकारी गराएका थिए। सर्पदंस रोग बिशेषज्ञ डा.कृष्ण आचार्यले बिरामीलाई जति सक्दो छिटो थप उपचार गर्नुपर्ने सल्लाह दिए।
डाक्टरको सल्लाह बमोजिम एम्वुलेन्स लिएर नेपालगन्जबाट दाङ आउने क्रममा बिचबाटो मै उपचार गरी बिरामीलाई बचाउन सफल भएका थिए । विरामीलाई जसरी पनि बचाउनु पर्दछ भनेर लागि पर्यौं जिल्ला अस्पताल प्यूठानका प्रमुख डाक्टर प्रमिला खनालले भनिन्–‘‘ हाम्रो प्रयास सफल भयो।’’ उनले उपचारमा खट्ने सबै स्वास्थ्यकर्मीहरुलाई धन्यवाद दिंदै प्यूठान अस्पतालमा सर्पदंसका बिरामीको उपचारका लागि विशेषज्ञ सेवा सुरु गर्न सबैको पहल जरुरी रहेको बताईन् ।
स्वास्थ्यकर्मी सम्मान कार्यक्रमका प्रमुख अतिथि प्युठान अस्पताल बिकास समितिका अध्यक्ष बिजय बिराज बिष्टले समय मै सबै क्षेत्रको सक्रियता र सहयोग भएमा सर्पदंसका बिरामीको ज्यान बचाउन सकिने बताए ।
खप्तडी बस्नेत कुलपुजा समितीका सदस्य भोज बहादुर बस्नेतले सञ्चालन गरेको कार्यक्रममा बस्नेत परिवारको सम्मानले अस्पतालका स्वास्थ्यकर्मीहरु खुसी र उत्साहित बनेका थिए ।
