सवारी चालकहरुका लागि ट्राफिक नियम सम्बन्धि सचेतना कार्यक्रम जुम्रीमा भएको छ । शनिबार मल्लरानी यातायात प्रा.लिको आयोजना तथा जिल्ला ट्राफिक कार्यालय देबिस्थानको समन्वयमा बिजय फूलबारी बचत तथा ऋण सहकारी संस्थाको सभाहल जुम्रीमा कार्यक्रम भएको हो । कार्यक्रममा प्यूठान नगरपालिका भित्र रहेका अटो चालकहरुको सहभागिता थियो ।

जिल्ला ट्राफिक प्रहरी कार्यालय प्यूठानका ट्राफिक प्रमुख चन्द्र बहादुर के.सी ले चालकहरुलाई आफ्नो गाडीको रुटअनुसार चलाउन आग्रह गरेका छन् । चालकहरुले आफ्नो रुट भन्दा बाहेक र चालक अनुमति पत्र नलिई चलाउँदा दुर्घटना भएमा राज्यले कुनै पनि क्षतिपुर्ति नबेहोर्ने पनि जानकारी गराए । उनका अनुसार लाइसेन्स नभएको, मापसे गरेर गाडी चलाउने, ट्राफिक नियम उल्लङ्घन गर्ने चालकहरुलाई ५ सय देखि ५ हजार सम्म जरिवाना काट्ने अधिकार ट्राफिकलाई रहेको छ ।

साथै सिट क्षमता भन्दा बढि यात्रु राख्ने, तोकिएको भन्दा बढि भाडा लिने लगायतका गुनासो ट्राफिकमा आइरहेको भन्दै आगामी दिनमा त्यसो गरेको पाइए कार्वाही गरिने जिल्ला ट्राफिक कार्यालयले जनाएको छ ।