२०८० असोज २३विश्व मानसिक स्वास्थ्य दिवसको अवसर पारेर जिल्ला स्वास्थ्य कार्यालय प्यूठानमा सरोकारवाला निकायबिच आत्महत्या रोकथाम विषयक अन्तरक्रिया कार्यक्रम मंगलबार सम्पन्न भएको छ । मल्लरानी ग्रामिण विकास सरोकार केन्द्र प्यूठानको सहयोगमा जिल्ला स्वास्थ्य कार्यालय प्यूठानले अन्तरक्रिया कार्यक्रमको आयोजना गरेको हो । कार्यक्रममा जिल्ला समन्वय समिति प्यूठानका प्रमुख, उपप्रमुख, प्यूठान नगरपालिकाका उपमेयर, जिल्ला प्रहरी कार्यालय प्यूठानका प्रमुख, सञ्चारकर्मी लगायत सरोकारवाला निकाय सहभागि थिए ।
कार्यक्रममा जिल्ला स्वास्थ्य कार्यालय प्यूठानका प्रमुख हेमराज पाण्डेले प्यूठान जिल्लामा आत्महत्याको अवस्था, आत्महत्या घटाउन गर्नपर्ने प्रयास, रोकथाम बारे उल्लेख गरेका थिए । कार्यक्रममा सहभागिहरुले आत्महत्या रोक्न सबै सरोकारवाला निकायले साझा कार्यक्रम बनाएर लाग्नुपर्ने कुरामा जोड दिए ।
जिल्ला प्रहरी कार्यालय प्यूठानको तथ्यांकअनुसार प्यूठानमा २०७७ साल देखि हालसम्म २ सय ५० जनाले विभिन्न कारणले आत्महत्या गरेका छन् । यस वर्षको विश्व मानसिक स्वास्थ्य दिवसको नारा ‘मानसिक स्वास्थ्य सबैको अधिकार’ तय गरिएको छ ।
