प्यूठान नगरबजार क्षेत्रभित्र अनाधिकृत रुपमा व्यापार व्यवसाय संचालन भइरहेको भन्दै फलफूल तथा तरकारी व्यवसायी संघ प्यूठानले प्यूठान नगरपालिकालाई ध्यानाकर्षण पत्र बुझाएको छ । बुधबार फलफूल तथा तरकारी व्यवसायी संघ प्यूठानले चेरनेटा, क्वाडी, जुम्री, बिजुवार, मरन्ठाना, बाग्दुला, दम्ति, खप्रेङखोला लगायतका क्षेत्रमा खुल्ला रुपमा कृषिजन्य सामाग्री विक्री भइरहेको भन्दै व्यवस्थापन गर्न नगरपालिकालाई ध्यानाकर्षण पत्र बुझाएको फलफूल तथा तरकारी व्यवसायी संघ प्यूठानले जनाएको छ ।

व्यवसायीले नगरपालिका सहित विभिन्न निकायमा व्यवसायी दर्ता गर्नुेपर्ने भएपनि दर्ता नै नगरी नगरपालिकालाई चुनौती दिदै निर्वाध रुपमा व्यवसाय संचालन गर्दा जिल्लाका व्यवसायीहरुलाई असहज भएको जानकारी गराउदै ध्यानाकर्षण गराएको जिल्ला अध्यक्ष पदम बहादुर थापाको हस्ताक्षरितमा भनिएको छ ।

साथै नगर क्षेत्र वरिपरी भिडभाड हुने, जाथाभावी फोहोर हुँदा नगरको सौन्दर्यता घट्ने भएकाले यस्तो खालका सडक घुम्ति व्यापारीहरुलाई कानुन संवत ढंगले आफ्नो व्यवसाय संचालन गर्न पहल गरिदिन आग्रह समेत गरेको छ ।