२०८० पुस १९नेपाल टेलिकमको सेवा प्रवाहमा सेवाग्राहीहरुले गुनासो गरेका छन् । प्यूठानमा ग्राहकहरुले समयमै सेवा नपाएको भन्दै नेपाल टेलिकम प्रति गुनासो गरेका हुन । जिल्लाका धेरैजसो कार्यालयहरुमा पछिल्लो समय अनलाइन तथा इन्टरनेटको माध्यमद्धारा काम गरिदै आएको छ । समयमै इन्टरनेट सेवा जडान तथा मर्मत गर्न नपाउँदा सेवा प्रवाहमा समस्या आएको भन्दै टेलिकम प्रति गुनासो आएको हो ।
जिल्लाको स्वर्गद्धारी नगरपालिका स्थित सोत्रे स्वास्थ्य चौकीका इन्चार्ज हुनाराम विष्टले महिनौ बित्दा समेत टेलिकमको सेवा नपाएको गुनासो गरेका छन् । स्वास्थ्य संस्थामा इन्टरनेट जडान गर्न बिष्टले एक महिना अगाडी नेपाल टेलिकममा निवेदन दिएका थिए । पटक पटक टेलिकम कार्यालयमा आग्रह गर्दा पनि नेट जडान नभएपछि उक्त संस्थामा अहिले महंगो शुल्क तिरेर प्राइभेट कम्पनीको इन्टरनेट जडान गर्नु परेको उनले वताए ।
त्यस्तै कर कार्यालय चकचकेमा पनि महिनौ बित्दा समेत नेपाल टेलिकमद्धारा समयमै टेलिफोन जडान भएको छैन् । समयमा टेलिफोन जडान नहुँदा कार्यालयको दैनिक कामकाज र सेवाग्राही समेतले सास्ती खेप्नु परेको कार्यालयले जनाएको छ ।
उता नौवहिनी गाउँपालिका– ५ डाम्रीमा पनि उही समस्याले सेवाग्राही पिडित बनेका छन् । त्यहाँका स्थानीयलाई पनि नेपाल टेलिकमको टावरमा समस्या आउँदा नागरिकहरु सूचना तथा सञ्चारबाट बञ्चित वन्नु परेको वडा अध्यक्ष दलराज पुनमगरले बताए ।
नेपाल टेलिकम बिजुवार प्यूठानका कार्यालय प्रमुख निरन्जन श्रेष्ठले गा्रहकहरुको गुनासो आए पनि कार्यालयसँग पर्याप्त श्रोत साधनको अभावमा समयमै सेवा प्रवाह गर्न नसकेको बताएका छन् ।
