२०८० चैत २५प्यूठानमा ६ दिने आधारभुत स्काउट तालिम शनिबारबाट सुरु भएको छ । सामाजिक विकास डिभिजन कार्यालय प्यूठानको आयोजनामा प्यूठान र रोल्पाका ४५ शिक्षकहरुका लागि तालिम सञ्चालन भएको हो ।
सामाजिक विकास कार्यालय अन्तर्गत शैक्षिक क्रियाकलाप तालिम गराउनको लागि सहज पुग्ने भन्दै २ जिल्लाबाट प्रत्येक पालिकाका शिक्षकहरुको लागि तालिम सञ्चालन भएको प्रदेश तालिम आयुक्त तथा तालिमका सहायक प्रशिक्षक खुमाकान्त अधिकारीले जानकारी दिए । उनका अनुसार २३ शिक्षक र २२ शिक्षिका गरी ४५ जना शिक्षकहरु सहभागि भएका छन् । चैत २९ गते सम्म चल्ने तालिमको प्रशिक्षकमा बसन्तलाल शाक्य र शुशिला विष्ट रहेका छन् ।
सामाजिक विकास डिभिजन कार्यालय प्यूठानका प्रमुख पुण्य न्यौपानेको अध्यक्षतामा सञ्चालन भएको तालिममा जिल्ला समन्वय समिति प्यूठानका प्रमुख धरम बहादुर जि.सी प्रमुख अतिथि, प्यूठान नगरपालिकाका उपमेयर देवेन्द्र वर्मा र मल्लरानी गाउँपालिका उपाध्यक्ष रमेश कुमार श्रेष्ठ रहेका थिए । तालिम प्यूठान नगरपालिका ८ बाग्दुला स्थित जनता मा.वि मा भईरहेको छ ।
