गर्मी महिना सुरु भएसँगै पछिल्ला केहि दिन यता प्यूठान जिल्लाका विभिन्न स्थानमा आगलागी भएको छ ।
जिल्ला प्रहरी कार्यालय प्यूठानले दिएको जानकारी अनुसार जिल्लाका ७५ स्थानमा आगलागी भएको छ। चैत र वैशाखको महिनामा गरी हालसम्म आगलागीका कारण ३५ घर र ६८ वटा गोठ जलेर नष्ट भएका छन्। त्यस्तै ५९ वनमा आगलागी भएको छ भने ९६ पशु चौपायाको जलेर मृत्यू भएको छ । १९ चौपाया घाईते छन भने ६९ पंक्षी जलेर नष्ट भएको तथ्यांक जिल्ला प्रहरी कार्यालय प्यूठानले दिएको छ।

दिउँसोमा समयमा चल्ने अत्यधिक हावाहुरीको बेला सावधानी नअपनाउँदा आगलागीका घट्नाहरु बढ्ने गरेका छन । सलाई,लाईटरजस्ता प्रज्वलनशील वस्तु बालबालिकाले भेट्ने ठाउँमा नराख्न , जंगलमा सलाई तथा लाइटरको प्रयोग नगर्न र गर्नै पर्ने भए सावधानीपूर्वक प्रयोग गरी राम्रोसँग निभाउन र हावाहुरी चलेको समयमा सकेसम्म आगो नबाल्न तथा बाल्नै पर्ने भएमा सावधानी अपनाउन प्रहरीले सबैलाई अनुरोध समेत गरेको छ ।

त्यस्तै केहि दिन अघि माण्डवी गाउँपालिका–३ देवीस्थान स्थित सल्लाको खोटो संकलन गरेर राखिएको गोदाममा आगलागी भएको थियो ।
नेपालगन्जको गङ्गा गम रोजिन एन्ड टर्पेन्टाइन कम्पनीले घाटगद्दीमा संकलन गरेर राखिएको खोटोमा आगलागी भएको हो । शनिबार दिउँसो २ बजेबाट सल्केको आगलागी आइतबार मात्र नियन्त्रणमा आएको थियो । प्रहरीका अनुसार आगलागीबाट ७ हजार ५ सय डिब्बा टिनमा संकलन गरेर राखिएको १ लाख २ हजार किलो खोटो जल्दा करिब ७६ लाख ५० हजार रुपैयाँ बराबरको खोटो जलेर नष्ट भएकोे प्रहरीले जनाएको छ ।