नौबहिनी गाउँपालिका– ७ बल्लेखोला–मैरामारे जाने बाटो बर्षाले अवरुद्ध गरेको छ । असार ११ गते मंगलबार राती परेको पानीले बाटो अवरुद्ध गरेपछि यातायात ठप्प रहेको छ । बल्लेखोला देखी मैरामारेसम्म पुग्ने बाटो करिब ५ ठाउँमा जमिना भासिने र पहिरो आउने गरेको वडा नं ७ का वडाध्यक्ष रोम प्रसाद बुढाथोकीले जानकारी दिए । अध्यक्ष बुढाथोकीका अनुसार पहिरोले बाटोलाई खोल्सा बनाईदिदा पैदल यात्रा गर्न समेत कठिन परेको छ ।

अहिले सकड पूर्वाधार कार्यालय प्यूठानले पहिरोको अवस्था बारे बुझेको वडाध्यक्ष बुढाथोकीको भनाई छ । बल्लेखोला देखि मैरामारेसम्म जाने बाटो कालीमाटी, बिलौनी खोला, सुर्दिप स्वास्थ्य चौकी जाने बाटोको गोगनपानी खोला लगायतका ठाउँमा पहिरोले बाटो अस्तव्यस्त बनाएको छ । यसको लागि आफुले पालिका र सम्बन्धित कार्यालयमा समेत यो समस्या जानकारी गराएको बताए ।

स्थानीय तह सञ्चालनमा आएपछि २०७५ सालदेखि नयाँ ट्र्याकमा सुरु भएको बल्लेखोला–मैरामारे मोटरबाटोमा बर्खाको समयमा त्यस ठाउँका स्थानीयले सास्ती खेप्दै आएका छन् । साघुँरो बाटो भएका कारण बल्लेखोला–मैरामारे बाटोको स्तरोन्नतीको लागि अहिले प्रदेश र गाउँपालिकाबाट बजेट विनियोजन भएको छ । बाटो खुलाउनको लागि आफु लागि परेको र गाउँपालिकामा समेत यसको लागि पहल थालेको अध्यक्ष बुढाथोकीको भनाई छ ।