जिल्लाको सदरमुकाम रहेको खलंगा मल्लरानी गाउँपालिका भित्र छ । सदरमुकाम सहितका वरिपरिका बस्तीहरुमा विजुलीको पहुँच पुगेको पनि दुई दशक भन्दा बढि भयो तर गरिवहरुलाई टुकि नै प्यारो भयो । मल्लरानी गाउँपालिका वडा नं.–३ ले आर्थिक बर्ष २०८०/०८१ मा अन्धकारमुक्त मल्लरानी– ३ कार्यक्रम राखि बजेटको ब्यवस्था गरेर गरिवहरुको घरमा बिजुली पुर्याउने लक्ष्यमा सोमबार सफल भयो ।

बत्तिमुनीको अध्यारोलाई उज्यालोमा रुपान्तरण गर्न यो कार्यक्रम लिएको मल्लरानी गाउँपालिका वडा नं. ३ का वडा अध्यक्ष नोमराज पौडेलले बताए । दुई दशक भन्दा बढि भयो गाउँमा बिजुली आएको तर गरिवलाई कहिल्यै आएन अध्यक्ष पौडेलले भने ‘बत्तिमुनीको अध्यारोलाई उज्यालोमा परिणत गरि गरिवको मुखमा हाँसो ल्याउन यो कार्यक्रम राखेको हो ।’ पौडेलले श्रमजीवि गरिव जनताहरु घरमा उज्यालो हुने भएपछि खुसी रहेको बताए ।

७३ बर्षिय दिर्घ सार्किले घरमा बिजुली कहिल्यै बालेनन् । घरमा भएको सोलारले पनि काम गरेन । वडा कार्यालयले वितरण गरेको मिटर, कालोतार एम.सि.वि बुझेपछि उनले भने–‘ मर्नेबेलामा भएपनि बिजुली बत्ती बाल्न पाईयो धन्यवाद छ अध्यक्षसाव ।’ सामग्री बुझेपछि उनले सबैका अगाडि गित गाएर रमाइलो समेत गरेका थिए ।

उनले आधिखोलामा मिटर पाईयो ए हजुर मर्नेबेलामा बोलको गित गाएर आफै नाँचेर सवैलाई हसाउँन समेत भ्याए । नागरिकको खुसी सानो कुरामा हुने भएकोले विपन्न बर्ग यो कार्यक्रमबाट लाभान्वित भएको वडा सचिव मनोज कुमार जि.सी बताउछन् ।

कार्यक्रममा सहभागि ६५ बर्षिय गिरा घर्तिमगरले टुकि र दियालो बालेर बसेको भन्दै अव बिजुली बाल्न पाउँदा निकै हर्षित भएको प्रतिकृया दिईन् । गरिवलाई अध्यक्षसावले हेर्नुभयो उनले भनिन्–‘मर्नेबेलामा भएपनि घरमा मिटर जोडेर बिजुली बाल्न पाइनेभयो ।’ वडाले ३ लाखको लागतमा बिजुलीबत्ती नपुगेका वडाका ४६ घरधुरीमा बिजुली पुर्‍याएको हो ।