प्युठानमा एक सय २९ जना सक्रिय एच.आइ.भी एड्स भएका बिरामी रहेका छन् । जिल्ला अस्पताल विजुवार प्युठानमा कार्यरत ए आर .टी कन्सुलर अश्लेषा विकका अनुसार हिजो सोमबार मात्र एक जनामा एच.आई.भी भेटिएसँगै १ सय २९ जना बिरामी भएका छन् । १४ वर्ष माथिका ६२ जना पुरुष र ६२ जना महिला तथा १४ वर्ष मुनिका १ जना महिला हुँदा ४ जना पुरुष रहेका छन् ।

सोही अवधिमा ऐरावती गाउँपालिकामा सबै भन्दा बढी २८ जना एचआइभीका बिरामी छन् । साथै गुल्मीका ४ जना बिरामीले समेत प्युठान अस्पतालबाट नियमित रूपमा औषधी सेवन गर्दै आएका छन् ।

एचआइभी सङ्क्रमितको सबै उपचार सेवा तथा औषधी निःशुल्क रूपमा अस्पतालबाट उपलब्ध गराउँदै आएको विकले जानकारी गराइन । आजीवन नै यसको औषधी प्रयोग गरिरहनु पर्ने उनको भनाई छ ।

एचआइभीबारे तथ्याङ्क सङ्कलन गर्ने, बिरामीको अवस्थाबारे जानकारी लिने काम प्युठान प्लसले गर्दै आएको छ । जिल्लामा प्युठान प्लस २०६९ चैत २७ गते स्थापना भएको थियो । एचआइभी सङ्क्रमितको सम्पर्कमा आएको २८ दिन भित्र औषधी उपचार गरेमा रोग नलाग्ने सम्भावना समेत उच्च हुने एआरटी कन्सुलर विकको भनाई छ ।