प्युठान नगरपालिका– ९ र १० बुढादेवीका विस्थापित बाढीपीडितलाई भेट्न पूर्व सञ्चार मन्त्री रेखा शर्मा पुगेकी छन् । सोमबार उनीसहित लुम्बिनी प्रदेशका पूर्व अर्थमन्त्री कृष्णध्वज खड्का, प्युठान नगरपालिकाका पूर्व नगर प्रमुख अर्जुन कुमार कक्षपती प्रभावित क्षेत्रमा पुगेका हुन् ।

बाढी प्रभावित क्षेत्रको अवस्था, पीडितहरूको गुनासो सुन्न बुढादेवी आएको पूर्व मन्त्री शर्माले जानकारी दिइन् । प्रतिनिधि सभा सदस्य शर्माले बाढीपीडितको समस्या समाधानका लागि नेपाल सरकारलाई जिम्मेवार बनाउन संसद्मा कुराहरू राख्ने, विभिन्न कार्यालयहरूमा समन्वय गरी पीडितको पक्षमा काम गर्ने प्रतिबद्धता व्यक्त गरेकी छन् ।

त्यसै गरी खड्काले बाढी प्रभावित क्षेत्रको समस्या समाधानका लागि सरकार सङ्गै अन्य क्षेत्रमा समेत सहयोगको अपिल गर्नुपर्ने धारणा राख्दै पीडितको पुनः स्थापनामा आफ्नो सक्दो पहल रहने कुरा व्यक्त गरे ।

साउन १० गते भुस वाङ खोलामा लेदो सहितको बाढी आइ घरमा पस्दा प्युठान नगरपालिका–९ र १० का १५ घर विस्थापित भएका थिए । विस्थापित परिवारको पुनः स्थापनाको कुनै टुङ्गो छैन । एक महिना अघि घरमा बाढी पस्दा विस्थापित परिवारको पुनः स्थापना नहुँदा पीडितहरू चिन्तित छन् । आफन्त, भाडाको घरमा बसेका पीडितहरूलाई सरकारले पुनः स्थापना गर्न कुनै कदम नचालेको गुनासो छ ।