आफ्नो नाम नखुलाउने सर्तमा प्युठानमा एक सहयोगदाताले विद्यालयमा अध्ययनरत विद्यार्थीलाई १ लाख बराबरको सामाग्री सहयोग गरेका छन् । २ वटा विद्यालयमा वडामार्फत वितरण गर्ने गरी सहयोग प्राप्त भएको प्यूठान नगरपालिकाका प्रवक्ता तथा ३ नम्बर वडाध्यक्ष सुमनराज श्रेष्ठले बताए ।

आइतबार प्यूठान नगरपालिका ३ कुवापानि स्थित पद्मा प्राथमिक विद्यालय र मुक्ति माध्यमिक विद्यालयमा उक्त सामाग्री वडाध्यक्ष श्रेष्ठमार्फत विद्यार्थीलाई हस्तान्तरण गरिएको छ । पद्मा प्रावि का २९ जना विद्यार्थीलाई ज्याकेट, झोला र जुक्ता वितरण गरिएको छ भने मुक्ति मा.वि.का २६ जना अभिभावक विहीन बालबालिकालाई ट्रयाकसुट र जुत्ता वितरण गरिएको हो ।

शैक्षिक सामाग्री पाएपछि विद्यार्थी खुसी भएका छन् । सानो सहयोगमा पनि ठुलो प्रचार खोज्ने चलन बढिरहेको समयमा एक लाखको सामाग्री सहयोग गर्दा पनि नामै नखुलाउने सहयोगदातालाई सामाग्री वितरण कार्यक्रमका सहभागी विद्यार्थी र अभिभावकले प्रशंसा गरेका थिए

सहयोगदाताबाट आएको सामाग्री हस्तान्तरण गर्दै वडाध्यक्ष श्रेष्ठले दाताको ‘एउटा हातले गरेको सहयोग अर्को हातलाई थाहा नदिने’ इच्छाअनुसार दाता र उनका परिवारको परिचय नखुलाई सामाग्री वितरण गरिएको  बताए । दाताको सहयोगले कुनै पनि सहयोग प्रचारका लागि होइन मानवीयताका लागि हो भन्ने सन्देशसहित विद्यार्थीको पठनपाठनमा हौसलाका मिल्ने अध्यक्ष श्रेष्ठको विश्वास छ ।