ऐतिहासिक पर्यटकीय गन्तब्य भित्रिकोटको पर्यटन प्रबर्धनका लागि शुक्रबार प्यूठान नगरपालिका वडा नं ७ को आयोजनामा तेस्रो भित्रिकोट दौड प्रतियोगिता हुँदैछ ।

महाअष्टमीमा गरिँदै आएको दौड प्रतियोगताको तयारी भईरहेको आयोजकले जनाएको छ । २०७९ सालदेखि सुरु गरिएको दौड प्रतियोगिताको बिजेतालाई यसवर्ष प्रथम, द्घितिय, तृतीय र सान्त्वनालाई क्रमस: १५ हजार, १० हजार, ७ हजार र ३ हजार रुपैयाँ पुरस्कारको ब्यवस्था गरिएको वडाअध्यक्ष नेत्र बहादुर के.सी. ले बताए।

प्यूठान नगरपालिका ७ पुण्यखोला स्थित सैनिक ब्यारेक नजिकैबाट भित्रिकोट दरवार स्थलसम्म ७ हजार ५ सय मिटर दुरिको दौड प्रतियोगिता बिहान ७:३० बजे सुरु हुने वडाअध्यक्ष के.सी. ले जानकारी दिए। नेपाल राज्यको एकिकरण पूर्व चौविसे राज्यहरु मध्ये शक्तिशाली राज्यको रुपमा रहेको भित्रिकोटको पर्यटन प्रवर्द्घन गर्न दौड आयोजना गरिएको उनको भनाई छ।

लिगलिगकोटको दौड प्रतियोगिताको परम्परालाई झल्को दिने गरी प्यूठानमा भित्रिकोट दौडको आयोजना हुन थालेको दौड आयोजना व्यवस्थापन समितिका सदस्य सुशील पोख्रेलले बताए । नेपाल एकीकरणअघि हाल गोरखा जिल्लामा पर्ने लिगलिग कोटमा दौडेर प्रथम हुने व्यक्ति राजा हुने परम्परा थियो । बाइसे–चौबीसे राज्यमध्ये लिगलिगकोटमा विसं १६०४ मा सुरु भएको मानिएको दौड २०६७ सालबाट निरन्तरता हुन थालिएको हो । तत्कालीन राजा द्रव्य शाहले दौडमा विजय हासिल गरी लिगलिगकोटको राजा बनेपछि लिगलिगकोटमा दौडिएर राजा हुने परम्पराको अन्त्य भएको मानिन्छ । ऐतिहासिक महत्वको भित्रिकोट दरबार क्षेत्र पर्यटनको हवको रुपमा विकासका लागि सरोकारवालाले ध्यान पूर्याउनु पर्ने पोख्रेलले बताए ।