प्यूठानको पर्यटकीय स्थल मल्लरानी डाँडामा सञ्चालन गरिएको जिपलाइन अलपत्र परेको छ । व्यापक प्रचार गरी सञ्चालनमा ल्याइएको जिपलाइन गत श्रावण महिनादेखि रोकिएको छ ।

बर्खामा २ महिना जिपलाइन बन्द गर्ने समितिको आन्तरिक छलफल भए पनि सञ्चालन गर्न नसकिएको मल्लरानी टुरिजम इन्भेस्टमेन्ट कम्पनी प्रा.लि.का अध्यक्ष इमानसिंह भारतीले बताए  । १ करोडको लगानीमा तयार गरिएको प्रोजेक्ट साउन यता बन्द रहेको कम्पनीका शेयर सदस्य बासु प्रसाद श्रेष्ठले बताए । जिपलाइन  सञ्चालन गर्न जिम्मेवारी लिएको टिमले जिम्मेवारी पूरा नगर्दा र कानुनी प्रक्रिया पूरा नहुँदा जिपलाइन रोकिएको श्रेष्ठले बताए ।

पूर्व सूचनाविना सञ्चालकले जिपलाईन बन्द गर्दा जिपलाईन चढ्ने भनेर मल्लरानी पुगेका धेरै पर्यटकहरू निराश भएर फर्कने गरेका छन् । तिहार बिदामा गाउँ आएको बेला जिपलाईन चढ्न मल्लरानी पुगेर फर्किएको मल्लरानी गाउँपालिका ३ का रेशम के.सी. ले बताए । ‘श्रीमतीलाई लिएर जिपलाईन चढ्न मल्लरानी पुगेको थिएँ । यत्तिकै फर्कनु पर्‍यो ।’ के.सी. ले भने– ‘जिपलाईन चढ्न पुगेको त लठ्ठा मात्र रैछ ।’

स्थानीय तह कार्यान्वयन पछि सुनसान बनेको जिल्ला सदरमुकाम खलंगा मल्लरानीमा जिपलाइन सञ्चालनपछि लयमा फर्कने आशा स्थानीयले गरेका थिए ।  हिजोआज जिपलाइन बन्द भएपछि स्थानीय निराश छन् ।