प्यूठान जिल्लामा पछिल्लो समयमा जिल्ला प्रशासन कार्यालयले विभिन्न विकास निर्माणका कार्यहरू, अवरुद्ध योजनाहरू र रुग्ण बनेका कामहरूलाई समयमा सम्पन्न गर्नका लागि लिएको पहल,गरेको समन्वय र जिल्लाबाट निर्वाचित जनप्रतिनिधि एवं राजनीतिक दलहरूको ऐक्यबद्धता सकारात्मक छ । जनप्रतिनिधि,प्रशासन र राजनीतिक नेतृत्वको सकारात्मक प्रयासका प्रतिफलहरू आंशिक रूपमा देखा पर्न थालेका छन् ।

दुर्गम बस्तीहरूमा भई रहेका सार्वजनिक र सर्वपक्षीय छलफलले मूर्तरूप लिन थालेको छ । जिल्लाकै मध्य भागमा निर्माणाधीन  अवरुद्ध सब–स्टेसन सञ्चालनमा लिइएका पहल, शैक्षिक सुधारका निम्ति स्थानीय स्तरमा र जिल्ला स्तरमा चलाइएका पहल एवं आत्महत्या न्यूनीकरण एवं सामाजिक विकृति रोक्न गरिएका सर्वपक्षीय छलफल र पहल चर्चा लायक छन् । यी पहलहरूले प्यूठान जिल्लाको विकास, सुशासन, सेवा प्रवाह र सामाजिक न्यायका निम्ति सकारात्मक योगदान गर्दै आम नागरिकको राज्यव्यवस्था प्रतिको सकारात्मक धारणा र बुझाई निर्माणमा सहयोग पुर्‍याउनेछ ।

नागरिकमा जागिरहेको सेवा प्रवाहप्रतिको असन्तुष्टि, राजनीति प्रतिको निराशा र सामाजिक वितृष्णाको निवारण गर्ने उपाय भनेकै राजनीतिक दलका एजेन्डा, जनप्रतिनिधिका नीति र राष्ट्रसेवकले गर्ने कार्यान्वयनका कारण समग्रमा नागरिकले पाउने डेलिभरीमार्फत हो । त्यसका लागि सबै पक्षहरू जिम्मेवार हुन्छन् । नागरिक समाज र आमसञ्चार जगतले यी पक्षका खराबीहरूमाथि औँला उठाउने र सकारात्मक कदमले जनतामा आशा जगाउँदा समग्र लोकतन्त्र मजबुत हुन्छ । यस कारण सर्वपक्षीय पहलकदमीले सकारात्मक नतिजा लिनेछ भन्ने विश्वास गर्न सकिन्छ ।

तर, यस्ता पहलकदमीको निरन्तरता दिने र अर्थपूर्ण निष्कर्षमा पुर्‍याउने कुरामा सबैको पहल हुनु जरुरी छ । कामको उठान गर्नुभन्दा त्यसलाई निष्कर्षमा पुर्‍याउनु महत्त्वपूर्ण हो । नागरिकमा आशा जगाइसकेपछि त्यो पूरा भएन भने थप निराशा बढ्न सक्छ । आलोचना हुन्छ । त्यस कारण अहिले जुन पहलकदमीहरू देखिएका छन् तिनीहरूलाई पूर्णतया निष्कर्षमा पुर्‍याउने र अर्थपूर्ण बनाउनेमा सबैको ध्यान पुग्नु जरुरी छ ।