मल्लरानी गाउँपालिका वडा नं. ३ को कार्यालयले २ गाउँबाट सेवा दिने भएको छ । बुधवार प्रतिनिधि सभा सदस्य सूर्य बहादुर थापा क्षेत्रीले सेवा विस्तार कार्यक्रमको उद्घाटन गरेका छन् ।

उद्घाटन कार्यक्रममा मन्तव्य राख्दै थापाले घुम्ती सेवा विस्तारको कार्यलाई निरन्तर रूपमा अगाडि बढाउन आग्रह गरेका छन् । जरुरी योजनाहरूमा आवश्यक सहकार्यका लागि सङ्घीय सांसदको हिसाबले आफू सधैँ तयार रहेको बताउँदै थापाले विकासका सवालमा सहकार्य र साझेदारी आवश्यक हुने बताए ।

साबिकको रस्पुरकोट र धरमपानी गाविस  मिलेर बनेको वडा रहेकाले जनतालाई पायक हुने गरी रस्पुरकोटबाट पनि सेवा दिन थालिएको वडाध्यक्ष नोमराज पौडेलले बताए । हालका लागि हप्ताको १ दिन सेवा दिने तयारी गरिए पनि आवश्यक परेमा २ दिन सेवा दिन सकिने उनले बताए ।

कार्यक्रममा दुर्घटनामा मृत्यु भएका वडा सदस्य दामोदर नेपालीको नाममा शारदा मावि का लागि स्थापना गरिएको अक्षयकोषको रकम हस्तान्तरण गरिएको छ । वडाका वर्तमान र केही पूर्व जनप्रतिनिधिहरूबाट ३५ हजारको अक्षयकोष स्थापना गरिएकोमा प्रतिनिधि सभा सदस्य थापाले सोही कार्यक्रममा आफ्नो तर्फबाट १० हजार र श्रीमतीको तर्फबाट ५ हजार थपेर अक्षयकोषलाई ५० हजार पुर्‍याउन सहयोग गर्ने बताएका छन् ।

सोही कार्यक्रममा स्थानीय बासी समेत रहेका डा. राजेन्द्र पौडेललाई सम्मान गरिएको थियो ।